عشرہ محرم الحرام: لاہور سمیت پنجاب بھر میں ہائی الرٹ، 31 ہزار سے زائد پولیس اہلکار سکیورٹی پر تعینات

لاہور: (پنجاب پوسٹ)عشرہ محرم الحرام کے سلسلے میں لاہور سمیت پنجاب بھر میں سکیورٹی کے سخت اور غیرمعمولی انتظامات کیے گئے ہیں۔ ترجمان پنجاب پولیس کے مطابق 4 محرم الحرام کو صوبے بھر میں 278 عزاداری جلوس اور 2 ہزار 734 مجالس منعقد ہو رہی ہیں جن کی سکیورٹی کیلئے 31 ہزار سے زائد پولیس افسران اور اہلکار فرائض سرانجام دے رہے ہیں۔ترجمان کے مطابق صوبے بھر میں سکیورٹی انتظامات کو مزید مؤثر بنانے کیلئے 23 ہزار سے زائد کمیونٹی رضاکار بھی پولیس کے ساتھ معاونت فراہم کر رہے ہیں۔ لاہور میں آج 17 عزاداری جلوس برآمد ہوئے جبکہ 412 مجالس کے انعقاد کیلئے خصوصی سکیورٹی پلان پر عملدرآمد کیا جا رہا ہے۔

یہ بھی پڑھیں:فیصل آباد ڈویژن میں عشرہ محرم الحرام کے سکیورٹی اور انتظامی اقدامات کا اعلیٰ سطحی اجلاس، سخت نگرانی اور سہولیات کی فراہمی پر زور

آئی جی پنجاب عبدالکریم نے کہا ہے کہ عشرہ محرم الحرام کے دوران صوبے بھر میں سکیورٹی ہائی الرٹ رہے گی اور حکومت پنجاب کی جانب سے نافذ دفعہ 144 پر سختی سے عملدرآمد یقینی بنایا جائے گا۔ انہوں نے واضح کیا کہ ہوائی فائرنگ، اسلحہ کی نمائش، نفرت انگیز مواد کی تشہیر اور اشتعال انگیزی پر مکمل پابندی عائد ہے۔آئی جی پنجاب کے مطابق طے شدہ روٹس اور مقررہ مقامات کے علاوہ کسی بھی جگہ جلوس یا مجلس کی اجازت نہیں ہوگی۔ سیف سٹیز اتھارٹی، ضلعی انتظامیہ اور دیگر اداروں کے کیمروں کی مدد سے تمام سرگرمیوں کی مسلسل نگرانی کی جا رہی ہے تاکہ کسی بھی ناخوشگوار واقعے سے بروقت نمٹا جا سکے۔

انہوں نے بتایا کہ محرم سکیورٹی پلان کے تحت سی ٹی ڈی، سپیشل برانچ، ٹریفک پولیس، ڈولفن اسکواڈ، پیرو فورس اور دیگر فیلڈ فارمیشنز کو بھی تعینات کیا گیا ہے۔ لاؤڈ سپیکر ایکٹ پر سختی سے عملدرآمد کروایا جا رہا ہے جبکہ سوشل میڈیا پر نفرت انگیز اور فرقہ وارانہ مواد پھیلانے والے عناصر کے خلاف بھی کارروائی جاری ہے۔آئی جی پنجاب نے مزید کہا کہ تمام اضلاع میں قائم کنٹرول رومز کو سنٹرل پولیس آفس کے مرکزی کنٹرول روم سے منسلک کر دیا گیا ہے تاکہ سکیورٹی صورتحال کی مسلسل نگرانی اور اداروں کے درمیان مؤثر رابطہ برقرار رکھا جا سکے۔