لاہور(پنجاب پوسٹ)پنجاب ڈیزاسٹر مینجمنٹ اتھارٹی (پی ڈی ایم اے) کے مطابق گزشتہ 24 گھنٹوں کے دوران صوبے کے بیشتر دریاؤں میں پانی کے بہاؤ میں بتدریج کمی ریکارڈ کی گئی ہے، تاہم بعض مقامات پر اب بھی نچلے درجے کی سیلابی صورتحال برقرار ہے۔ پی ڈی ایم اے نے شہریوں کو احتیاطی تدابیر اختیار کرنے اور دریاؤں، نہروں اور ندی نالوں کے قریب غیر ضروری نقل و حرکت سے گریز کی ہدایت کی ہے۔پی ڈی ایم اے کے مطابق دریائے سندھ میں کالا باغ اور تونسہ کے مقام پر نچلے درجے کا سیلاب موجود ہے۔ کالا باغ کے مقام پر پانی کا بہاؤ 3 لاکھ 1 ہزار کیوسک جبکہ تونسہ کے مقام پر 3 لاکھ 85 ہزار کیوسک ریکارڈ کیا گیا ہے۔ تاہم تونسہ بیراج میں پانی کا بہاؤ معمول کے مطابق ہے۔
ادھر دریائے چناب میں سیلابی صورتحال میں نمایاں کمی دیکھی جا رہی ہے۔ مرالہ، خانکی، قادر آباد، تریموں اور پنجند کے مقامات پر پانی کا بہاؤ معمول پر آ چکا ہے۔ پی ڈی ایم اے کا کہنا ہے کہ گزشتہ 24 گھنٹوں کے دوران دریائے چناب میں طغیانی مسلسل کم ہوئی ہے جبکہ بالائی کیچمنٹ ایریاز میں بارشیں بھی رک چکی ہیں۔دریائے ستلج اور جہلم میں پانی کا بہاؤ مکمل طور پر نارمل قرار دیا گیا ہے، جبکہ دریائے راوی میں بلوکی اور سدھنائی کے مقام پر نچلے درجے کی سیلابی صورتحال برقرار ہے۔ بلوکی کے مقام پر پانی کا بہاؤ 63 ہزار کیوسک اور سدھنائی پر 53 ہزار کیوسک ریکارڈ کیا گیا، جبکہ جسڑ اور شاہدرہ کے مقامات پر صورتحال معمول کے مطابق ہے۔پی ڈی ایم اے کے مطابق وزیرآباد کے نالہ پلکھو میں اونچے درجے کی سیلابی صورتحال موجود ہے، جبکہ نارووال کے نالہ بسنتر میں نچلے درجے کا سیلاب برقرار ہے۔ نالہ پلکھو میں پانی کا بہاؤ 4 ہزار کیوسک جبکہ نالہ بسنتر میں ایک ہزار کیوسک ریکارڈ کیا گیا۔
یہ بھی پڑھیں:’’گدلا پانی ،گھپ اندھیرا‘‘ریسکیو 1122 نے سیلاب میں بہتی گائیں کیسے تلاش کیں؟
ڈی جی پی ڈی ایم اے عمر میلہ نے کہا ہے کہ بالائی علاقوں میں ہونے والی بارشوں کے باعث دریاؤں میں پانی کی آمد میں اضافہ ہوا، تاہم دریائے چناب کی صورتحال میں مسلسل بہتری آ رہی ہے۔ انہوں نے دریاؤں کے پاٹ میں موجود شہریوں سے فوری طور پر محفوظ مقامات پر منتقل ہونے کی اپیل کی اور کہا کہ حکومت پنجاب نے ممکنہ سیلاب سے متاثرہ علاقوں میں تمام ضروری انتظامات مکمل کر رکھے ہیں۔
ڈی جی پی ڈی ایم اے کے مطابق فلڈ ریلیف کیمپس میں متاثرین کو بنیادی سہولیات، خوراک اور ادویات فراہم کی جائیں گی۔ شہریوں کو ہدایت کی گئی ہے کہ وہ موسم اور سیلابی صورتحال کے پیش نظر احتیاطی تدابیر اختیار کریں، دریاؤں، نہروں اور ندی نالوں کے اطراف سیر و تفریح سے گریز کریں، دریا عبور کرتے وقت معیاری کشتیوں اور لائف جیکٹس کا استعمال یقینی بنائیں، جبکہ بچوں کو ہرگز دریاؤں اور ندی نالوں میں نہانے کی اجازت نہ دیں۔
