گجرات (پنجاب پوسٹ) پولیس نے سنگین مقدمات میں مطلوب اشتہاری مجرمان کے خلاف کارروائی کرتے ہوئے قتل کے مقدمے میں چار سال سے مفرور ملزم کو گرفتار کر لیا۔
پولیس کا مؤقف
پولیس کے مطابق ڈی پی او گجرات فیصل شہزاد کی زیرِ قیادت جاری کریک ڈاؤن کے دوران ایس ایچ او تھانہ لاری اڈا انسپکٹر مبشر نواز نے اپنی ٹیم کے ہمراہ کارروائی کرتے ہوئے مجرم اشتہاری محمد ندیم ولد محمد اکرم، سکنہ النبی کالونی کو گرفتار کیا۔

پولیس کے مطابق ملزم اور مقتول محمود حسین دونوں ٹرک ڈرائیور تھے اور ایک ہی گھر میں رہائش پذیر تھے۔ ملزم کو شبہ تھا کہ مقتول کے اس کی بیوی کے ساتھ تعلقات ہیں، جس کی رنجش پر اس نے مبینہ طور پر فائرنگ کرکے محمود حسین کو قتل کیا اور موقع سے فرار ہو کر روپوش ہوگیا تھا۔
پولیس کا کہنا ہے کہ ملزم چار سال سے گرفتاری سے بچ رہا تھا، تاہم جدید سائنسی ٹیکنالوجی اور پیشہ ورانہ مہارت کی مدد سے اسے گرفتار کر لیا گیا ہے، جبکہ مزید تفتیش جاری ہے۔

ڈی پی او گجرات فیصل شہزاد
ڈی پی او گجرات فیصل شہزاد کا کہنا ہے کہ سنگین جرائم میں ملوث اشتہاری مجرمان کو گرفتار کرکے قانون کے کٹہرے میں لانا گجرات پولیس کی اولین ترجیحات میں شامل ہے۔











