لاہور(پنجاب پوسٹ)لاہور ہائیکورٹ کے جسٹس اسد علی باجوہ نے اہم فیصلے میں قرار دیا ہے کہ شادی کے دوران پیدا ہونے والے بچے کی ولدیت محض ایک نجی ڈی این اے رپورٹ کی بنیاد پر ختم نہیں کی جا سکتی۔ عدالت نے برطانیہ کی نجی لیبارٹری کی وہ رپورٹ مسترد کر دی جس میں بچے کی ولدیت سے انکار کیا گیا تھا۔ فیصلے میں کہا گیا کہ یکطرفہ طور پر کرایا گیا نجی ڈی این اے ٹیسٹ بچے کی ولدیت کا حتمی قانونی ثبوت نہیں ہے۔ عدالت نے اسامہ طاہر اور دیگر کی آئینی درخواست بھی خارج کر دی۔
درخواست گزار کا موقف
درخواست گزار کا موقف تھا کہ ڈی این اے رپورٹ کے مطابق بچہ اس کا نہیں، اس لیے اس پر نان و نفقہ کی ذمہ داری عائد نہیں کی جا سکتی۔ اس نے فیملی کورٹ اور ایڈیشنل ڈسٹرکٹ جج گوجرانوالہ کے فیصلوں کے خلاف ہائیکورٹ سے رجوع کیا تھا، جسے عدالت نے مسترد کر دیا۔
خفیہ ڈی این اے ٹیسٹ بنیادی حقوق کے منافی
عدالت نے قرار دیا کہ عدالت کی اجازت اور ماں کی رضامندی کے بغیر بچے کے جسمانی نمونے لے کر خفیہ ڈی این اے ٹیسٹ کرانا بنیادی حقوق کے منافی ہے۔ فیصلے کے مطابق ڈی این اے ٹیسٹ کے معاملے میں بچے کی عزتِ نفس، رازداری اور ذہنی و جذباتی تحفظ کو مقدم رکھنا ضروری ہے۔ یہ ٹیسٹ محض سائنسی سہولت یا فریقین کی خواہش پر نہیں کرایا جا سکتا، اور اس سے پہلے بچے کے بہترین مفاد اور بنیادی حقوق کا جائزہ لینا لازم ہے۔
آئینی حوالے
عدالت نے آئین کے آرٹیکل 14 کا حوالہ دیا، جو انسانی عزت و وقار اور نجی زندگی کے تحفظ کی ضمانت دیتا ہے۔ آرٹیکل 4 اور 9 کے تحت کسی شخص کی آزادی اور جسمانی خودمختاری میں غیر قانونی مداخلت نہیں کی جا سکتی۔
ولدیت کا قانونی اصول
فیصلے میں کہا گیا کہ درست نکاح کے دوران چھ قمری ماہ سے زائد مدت میں پیدا ہونے والا بچہ شوہر کی قانونی اولاد تصور ہوگا۔ ولدیت کو چیلنج کرنے کے لیے والد کو پیدائش کے بعد 40 روز کے اندر اقدام کرنا ہوتا ہے۔ پیدائش کے چار ماہ سے زائد عرصے بعد کرایا گیا نجی ڈی این اے ٹیسٹ ولدیت کے تنازع میں قابلِ قبول نہیں ہو سکتا۔
نان و نفقہ کا فیصلہ برقرار
ہائیکورٹ نے نابالغ بچے کا ماہانہ نان و نفقہ 25 ہزار روپے مقرر کرنے کا فیصلہ برقرار رکھا۔ فیملی کورٹ نے ابتدائی طور پر یہ رقم 10 ہزار روپے مقرر کی تھی، جسے اپیلٹ کورٹ نے بڑھا کر 25 ہزار روپے کر دیا تھا۔ نان و نفقہ میں سالانہ 10 فیصد اضافے کا حکم بھی برقرار رکھا گیا۔
عدالت نے وضاحت کی کہ بچے کے نان و نفقہ میں خوراک، لباس، رہائش، تعلیم اور علاج معالجے کے اخراجات شامل ہیں۔ بچے کی جسمانی، ذہنی اور جذباتی نشوونما کے اخراجات بھی اسی کا حصہ ہیں۔ نان و نفقہ کے تعین میں بچے کی ضروریات اور والد کی مالی استطاعت بنیادی عوامل ہیں۔ بیرون ملک قیام اور مالی معاملات سے متعلق شواہد بھی والد کی مالی حیثیت کے تعین میں اہم قرار دیے گئے۔ عدالت کے مطابق والد محض آمدن کا دستاویزی ثبوت پیش نہ ہونے کی بنیاد پر ذمہ داری سے بری نہیں ہو سکتا۔
جہیز کے سامان سے متعلق فیصلے برقرار
عدالت نے بیوی کے جہیز کے سامان کی واپسی یا متبادل قیمت سے متعلق ماتحت عدالتوں کے فیصلے بھی برقرار رکھے۔ جہیز کے دعوے میں تمام اشیا منظور نہیں کی گئیں، اور شواہد کی بنیاد پر بعض اشیا خارج کی گئیں۔ سامان کی متبادل قیمت 9 لاکھ 70 ہزار روپے مقرر کرنے کا فیصلہ برقرار رہا۔
آئینی درخواست میں مداخلت کا دائرہ
عدالت نے قرار دیا کہ آئینی درخواست میں ماتحت عدالتوں کے فیصلوں میں مداخلت کے لیے واضح قانونی یا دائرہ اختیار کی خلاف ورزی ثابت کرنا ضروری ہے۔ محض دوسرے ممکنہ نقطۂ نظر کی بنیاد پر شواہد پر مبنی فیصلوں میں مداخلت نہیں کی جا سکتی۔











