فیصل آباد( پنجاب پوسٹ ) گورنمنٹ گرلز پرائمری سکول 103 جی بی میں مقامی بدمعاش کی جانب سے خواتین اساتذہ اور طالبات کو ہراساں کرنے، گالم گلوچ اور دھمکیاں دینے کا واقعہ پیش آیا ہے، جبکہ ہیڈ مسٹریس کو بھی جان سے مارنے کی دھمکی دی گئی ہے۔
سکول کی ہیڈ مسٹریس نے ایس ایچ او کو تحریری درخواست دے کر واقعے کی اطلاع دی اور فوری پولیس کارروائی کا مطالبہ کیا ہے۔ ہیڈ مسٹریس نے الزام عائد کیا کہ جب وہ سکول کی بوسیدہ دیوار تعمیر کروا رہی تھیں تو جواد بٹ نامی شخص نے انہیں دھمکیاں دی ہیں ۔جبکہ گالم گلوج بھی کی ہے ۔
واقعے نے سکول میں زیرتعلیم بچیوں اور خواتین اساتذہ کی سکیورٹی کو شدید خطرات سے دوچار کر دیا ہے۔ ایک تعلیمی ادارے میں بااثر افراد کی اس نوعیت کی مداخلت، خواتین اساتذہ کو ہراساں کرنا اور سکول سربراہ کو قتل کی دھمکی دینا نہایت تشویشناک ہے۔

ہیڈ مسٹریس نے پولیس حکام سے مطالبہ کیا ہے کہ جواد بٹ کے خلاف فوری قانونی کارروائی کی جائے، انہیں اور سکول کے عملے کو تحفظ فراہم کیا جائے اور سکول کی سکیورٹی یقینی بنائی جائے۔
وزیراعلیٰ پنجاب مریم نواز، وزیر تعلیم رانا سکندر حیات اور آئی جی پنجاب سے مطالبہ ہے کہ اس واقعے کا فوری نوٹس لیں۔ کیا پنجاب میں ہماری بچیاں اور انہیں تعلیم دینے والی خواتین اساتذہ اپنے سکولوں میں بھی محفوظ نہیں؟











