ہارون آباد (پنجاب پوسٹ) ہندو بالمیکی مندر میں دیوالی کے موقع پر خصوصی مذہبی و ثقافتی تقریب کا انعقاد کیا گیا۔تقریب میں صوبائی صدر مسلم لیگ ضیاء و رکن پنجاب اسمبلی چوہدری غلام مرتضیٰ نے بطور مہمان خصوصی شرکت کی۔ اس موقع پر سابق وائس چیئرمین میونسپل کمیٹی ملک محمد ریاض خلجی سمیت دیگر معززین بھی موجود تھے۔
مہمان خصوصی نے بالمیکی رہنماؤں کے ہمراہ دیوالی کا کیک کاٹا اور مٹھائی تقسیم کی۔ شرکاء نے اس موقع پر مذہبی رواداری، بین المذاہب ہم آہنگی، امن اور بھائی چارے کے فروغ کے عزم کا اظہار کیا۔مندر آمد پر صدر سوسائٹی ہندو بالمیکی مندر ہربنس لال سلطانی اور دیگر رہنماؤں نے مہمانوں کا پرتپاک استقبال کیا۔
اس موقع پر گفتگو کرتے ہوئے ایم پی اے چوہدری غلام مرتضیٰ، ملک محمد ریاض خلجی اور ہربنس لال سلطانی کا کہنا تھا کہ دیوالی خوشیوں، محبت اور بھائی چارے کا تہوار ہے۔ پاکستان میں تمام اقلیتیں ملکی معاشرے کا اہم حصہ ہیں اور انہیں اپنے مذہبی تہوار منانے کی مکمل آزادی حاصل ہے۔ ان کا کہنا تھا کہ ایک دوسرے کے مذاہب اور عقائد کا احترام اور بین المذاہب ہم آہنگی ہی پرامن معاشرے کی بنیاد ہے۔ تقریب کے موقع پر سکیورٹی کے خصوصی انتظامات بھی کیے گئے تھے۔
یہ بھی پڑھیں:الخدمت فاؤنڈیشن کے زیرِ اہتمام دیوالی کی تقریبات، 850 ہندو خاندانوں میں تحائف تقسیم
