لاہور: انسداد پولیو مہم جاری، پانچ روز میں 21 لاکھ سے زائد بچوں کو قطرے پلا دیے گئے

لاہور(پنجاب پوسٹ)لاہور میں جاری خصوصی انسداد پولیو مہم کے دوران پانچ روز میں 21 لاکھ سے زائد بچوں کو پولیو سے بچاؤ کے قطرے پلا دیے گئے ہیں، جبکہ مہم کا پہلا کیچ اپ روز آج شروع ہو گیا۔ ڈپٹی کمشنر لاہور کیپٹن (ر) محمد علی اعجاز نے مہم کی پانچ روزہ کارکردگی کا جائزہ لیتے ہوئے ہدایت کی کہ پانچ سال تک کے ہر بچے کی کوریج کو یقینی بنایا جائے۔

اجلاس اور شرکاء

ڈپٹی کمشنر لاہور کیپٹن (ر) محمد علی اعجاز کی زیر صدارت اجلاس منعقد ہوا جس میں مہم کی پانچ روزہ کارکردگی کا تفصیلی جائزہ لیا گیا۔ اجلاس میں ایڈیشنل ڈپٹی کمشنر میونسپل سروسز عبداللہ خان، سی ای او ہیلتھ ڈاکٹر آصف ارباب خان، تمام اسسٹنٹ کمشنرز، بین الاقوامی مبصرین اور ڈسٹرکٹ ڈپٹی ہیلتھ آفیسرز (ڈی ڈی ایچ اوز) نے شرکت کی۔

یہ بھی پڑھٰیں:لاہور میں 687 بچوں کے والدین پولیو کے قطرے پلانے سے انکاری ، بچوں کو کیسے قطرے پلائے گئے ؟

بریفنگ

سی ای او ہیلتھ ڈاکٹر آصف ارباب خان نے اجلاس کو بریفنگ دیتے ہوئے بتایا کہ پانچ روز کے دوران 21 لاکھ 53 ہزار 20 بچوں کو پولیو کے قطرے پلائے گئے۔ اسی عرصے میں پولیو ٹیموں نے 14 لاکھ 99 ہزار 695 گھرانوں تک رسائی مکمل کی۔

ڈپٹی کمشنر کی ہدایات

ڈپٹی کمشنر لاہور نے تمام اسسٹنٹ کمشنرز کو ہدایت کی کہ مہم کے دوران پیش آنے والے مسائل فوری طور پر حل کیے جائیں۔ انہوں نے کہا کہ پانچ سال تک کے ہر بچے کی کوریج کی جائے اور نومولود بچوں کو پولیو کے قطرے پلانا یقینی بنایا جائے۔ ان کا کہنا تھا کہ کوئی بھی مسئلہ اسسٹنٹ کمشنرز کو رپورٹ کیا جائے، جس کا فوری حل نکالا جائے گا۔

کیپٹن (ر) محمد علی اعجاز نے کہا کہ نومولود اور انکاری بچوں کی کوریج انتہائی اہم ہے۔ انہوں نے ہدایت کی کہ انکاری والدین کو آگاہی دے کر انہیں قطرے پلانے پر آمادہ کیا جائے۔ ڈپٹی کمشنر نے یقین دلایا کہ انسداد پولیو مہم کے لیے تمام تر وسائل فراہم کیے جائیں گے۔

اجلاس کے اختتام پر ڈپٹی کمشنر لاہور نے کہا کہ ہر بچے کو پولیو سے محفوظ بنانا ہمارا قومی فریضہ ہے، اور اس مقصد کے لیے تمام متعلقہ ادارے مل کر کام کریں۔

یہ بھی پڑھیں:پنجاب حکومت سرحدی علاقوں میں 24 گھنٹے پولیو ٹیمیں کیوں تعینات کر رہی ہے ؟