فیصل آباد (پنجاب پوسٹ) پولیس نے جرائم پیشہ عناصر کے خلاف گھیرا تنگ کرتے ہوئے گزشتہ 24 گھنٹوں کے دوران منشیات فروشوں اور ناجائز اسلحہ رکھنے والوں کے خلاف بھرپور کارروائیاں کیں، جن کے دوران مجموعی طور پر 33 ملزمان کو گرفتار کر لیا گیا۔
پولیس کے مطابق منشیات فروشوں اور شراب کے کاروبار میں ملوث ملزمان کے خلاف کارروائی کرتے ہوئے 26 ملزمان کو گرفتار کیا گیا۔ گرفتار ملزمان کے قبضے سے 9 کلوگرام سے زائد ہیروئن، 23 کلوگرام 670 گرام چرس، 1 کلوگرام 20 گرام آئس، 12 کلوگرام بھکی اور 37 لیٹر شراب برآمد کی گئی۔
یہ بھی پڑھیں:منشیات فروشوں کے خلاف لاہور پولیس کا کریک ڈاؤن، رواں سال 6084 منشیات فروش گرفتار
دوسری جانب ناجائز اسلحہ رکھنے والوں کے خلاف کارروائی کرتے ہوئے مزید 7 ملزمان کو گرفتار کرکے ان کے قبضے سے آتشیں اسلحہ برآمد کر لیا گیا۔سی پی او فیصل آباد نے کہا کہ قانون کی عملداری یقینی بناتے ہوئے امن دشمن عناصر کو قانون کے کٹہرے میں لایا جائے گا۔
یہ بھی پڑھیں:لاہور: شاد باغ پولیس کا شیشہ کیفے پر چھاپہ، 10 ملزمان گرفتار
انہوں نے واضح کیا کہ شہر سے جرائم کے خاتمے تک فیصل آباد پولیس کی کارروائیاں پوری قوت کے ساتھ جاری رہیں گی۔فیصل آباد پولیس کا کہنا ہے کہ شہریوں کے جان و مال کے تحفظ اور امن و امان کے قیام کے لیے جرائم پیشہ عناصر کے خلاف بلاامتیاز کارروائیاں جاری رکھی جائیں گی۔
