بہاولنگر (پنجاب پوسٹ)تھانہ سٹی بی ڈویژن کی حدود میں شادی کا جھانسہ دے کر لڑکی سے زیادتی کے الزام میں مقدمہ درج کر لیا گیا ہے۔ ڈی پی او نے واقعے کا نوٹس لیتے ہوئے ملزم کی جلد گرفتاری کا حکم دیا ہے۔
ترجمان پولیس کے مطابق مقدمہ متاثرہ لڑکی عروج فاطمہ کی مدعیت میں درج کیا گیا۔ مدعیہ کے مطابق پیرا فورس کی بھرتی ٹیسٹ کے دوران اس کی جان پہچان ملزم حسام بلوچ سے ہوئی۔ الزام ہے کہ ملزم نے دو ماہ قبل شادی کا جھانسہ دے کر اسے ماڈل ٹاؤن کے ایک مکان میں لے جا کر زبردستی زیادتی کا نشانہ بنایا۔ بعد ازاں ملزم شادی کے وعدے سے مکر گیا اور جان سے مارنے کی دھمکیاں دیں۔
ملزم حسام بلوچ پیرا فورس کا حاضر سروس ملازم ہے۔ ترجمان پولیس کے مطابق ملزم کی گرفتاری کے لیے چھاپے جاری ہیں اور مزید تفتیش کی جا رہی ہے، جبکہ ملزم کے خلاف محکمانہ کارروائی متعلقہ محکمہ کی جانب سے کی جا رہی ہے۔
ڈی پی او محمد عمران نے کہا کہ عوام کی جان و مال اور عزت و آبرو کا تحفظ پولیس کی اولین ترجیح ہے۔
