لاہور(پنجاب پوسٹ)گورنمنٹ کالج یونیورسٹی لاہور سے 10 غیر ملکی طلبہ نے اپنی ڈگریاں مکمل کر لیں، جن میں سری لنکا کے 9 طلبہ اور چین کی ایک طالبہ شامل ہیں۔ غیر ملکی گریجویٹس کے اعزاز میں جی سی یو کے مین کیمپس میں خصوصی تقسیمِ اسناد کی تقریب منعقد ہوئی، جہاں وائس چانسلر پروفیسر ڈاکٹر محمد عمر چوہدری نے طلبہ میں ڈگریاں تقسیم کیں۔
سری لنکا کے 9 طلبہ نے مائیکرو بائیولوجی، کیمسٹری اور کمپیوٹر سائنس میں بی ایس کی تعلیم مکمل کی، جبکہ چین سے تعلق رکھنے والی طالبہ سن ہیومن نے انٹرپرینیورشپ اور ایس ایم ای مینجمنٹ میں ایم ایس کی ڈگری حاصل کی۔ تقریب کے دوران غیر ملکی طلبہ نے پاکستان میں اپنے تعلیمی سفر، اساتذہ کی رہنمائی اور یونیورسٹی انتظامیہ کی جانب سے ملنے والی مہمان نوازی کو سراہا۔
یہ بھی پڑھیں؛حوثیوں کو تعلیم کی ضرورت ہے، ہم انہیں حرمین کے تقدس کا سبق پڑھائیں گے، وزیر تعلیم پنجاب
ایم ایس مکمل کرنے والی چینی طالبہ سن ہیومن نے پاکستان میں اپنے تجربے کو شاندار قرار دیتے ہوئے کہا کہ انہیں یہاں سے جانے کا دکھ ہے، تاہم وہ مستقبل میں اس تاریخی درسگاہ کا دورہ کرنے کے لیے دوبارہ پاکستان آئیں گی۔ سری لنکن طالبات فاطمہ رمانہ اور ساسنا راشد نے بھی جی سی یونیورسٹی کو اپنی ذاتی اور پیشہ ورانہ صلاحیتیں نکھارنے میں اہم قرار دیتے ہوئے کہا کہ وہ یہاں سے بہترین یادیں لے کر جا رہی ہیں۔
وائس چانسلر پروفیسر ڈاکٹر محمد عمر چوہدری نے فارغ التحصیل طلبہ کو مبارکباد دیتے ہوئے انہیں راوئینز کے عالمی نیٹ ورک کا حصہ بننے پر خوش آمدید کہا۔ انہوں نے کہا کہ گریجویٹس اب 163 سالہ تاریخی درسگاہ کے امین ہیں، جس نے دنیا کو نامور سائنسدان، رہنما اور ادبی شخصیات فراہم کی ہیں۔
یہ بھی پڑھیں؛پنجاب کے وزیر تعلیم "ماسٹر ” بن گئے ،پہلی کلاس کہاں لی اور بچوں کو کیا سبق پڑھایا ؟
وائس چانسلر نے بتایا کہ جی سی یونیورسٹی میں غیر ملکی طلبہ سے بھی وہی فیس وصول کی جاتی ہے جو مقامی پاکستانی طلبہ سے لی جاتی ہے۔ غیر ملکی طلبہ کی بڑھتی ہوئی تعداد اور سہولیات کے پیش نظر غیر ملکی طالبات کے لیے الگ ہاسٹل بلاک مکمل کر لیا گیا ہے، جو آئندہ سمسٹر سے فعال ہوگا، جبکہ طلبہ کے لیے نیا ہاسٹل بھی آئندہ 3 سے 4 ماہ میں مکمل کرنے کا منصوبہ ہے۔
تقریب کے اختتام پر وائس چانسلر نے فارغ التحصیل غیر ملکی طلبہ پر زور دیا کہ وہ اپنے اپنے ممالک میں جی سی یونیورسٹی لاہور کے سفیر کا کردار ادا کریں اور راوئین کی شاندار روایات کو آگے بڑھائیں۔
