لاہور(پنجاب پوسٹ)پنجاب حکومت نے ”ایئر آف یوتھ“ کے تحت نوجوانوں اور طلبہ کے لیے ”سی ایم مریم نواز الیکٹرک بائیک سکیم“ کو مزید آسان اور وسیع بنانے کا فیصلہ کیا ہے۔ سکیم کے تحت پنجاب کے طلبہ کو سوا لاکھ سے زائد الیکٹرک بائیکس فراہم کی جائیں گی، جبکہ وزیراعلیٰ مریم نواز شریف نے طلبہ پر مالی بوجھ کم کرنے کے لیے ڈاؤن پیمنٹ وصول نہ کرنے کی ہدایت کی ہے۔
وزیراعلیٰ مریم نواز شریف نے ماہانہ قسط کے علاوہ دیگر واجبات وصول کرنے کی سفارشات بھی مسترد کر دی ہیں۔ حکومت پنجاب ای بائیکس پر انٹرسٹ اور انشورنس کی رقم بھی خود ادا کرے گی، جبکہ طلبہ کے لیے ماہانہ تقریباً 3 ہزار روپے قسط مقرر کرنے کی تجویز پر اتفاق کیا گیا ہے۔
یہ بھی پڑھیں:مثالی گاؤں پراجیکٹ میرے دل کے بہت قریب، ہر گاؤں کی حالت بدلنا چاہتی ہوں، مریم نواز
وزیراعلیٰ مریم نواز شریف نے اسی ہفتے ای بائیک پورٹل کھولنے کا حکم دیتے ہوئے اہل طلبہ کو درخواست اور بائیک کی فراہمی کے عمل کو تیز کرنے کی ہدایت کی ہے۔ سکیم کے تحت اہل طلبہ کو چھ ہفتوں کے اندر ای بائیک فراہم کرنے کے لیے اقدامات کرنے کا بھی حکم دیا گیا ہے۔
سیکرٹری ٹرانسپورٹ عمران سکندر بلوچ نے اجلاس میں ”سی ایم الیکٹرک بائیک سکیم“ کے حوالے سے تفصیلی بریفنگ دی۔ بریفنگ کے مطابق ای بائیک کے ساتھ طلبہ کو ہیلمٹ اور سیفٹی راڈ بھی مفت فراہم کیے جائیں گے، جبکہ بائیک میں جدید لیتھیم آئرن فاسفیٹ بیٹری نصب ہوگی۔
وزیراعلیٰ کی ہدایت پر خواہش مند طلبہ کو ای بائیک چلانے کے لیے دو روزہ مفت ڈرائیونگ ٹریننگ بھی فراہم کی جائے گی، تاکہ نوجوان محفوظ انداز میں الیکٹرک بائیک استعمال کر سکیں۔
حکومت نے اس سکیم کو مستقبل میں طلبہ تک محدود رکھنے کے بجائے اس کا دائرہ کار بتدریج گورنمنٹ ملازمین، مختلف سرکاری محکموں، جنرل پبلک اور ڈیلیوری بوائز تک بڑھانے کی اصولی منظوری بھی دے دی ہے۔ اس اقدام کا مقصد ماحول دوست سفری سہولت کو فروغ دینے کے ساتھ نوجوانوں اور مختلف شعبہ ہائے زندگی سے وابستہ افراد کو آسان ٹرانسپورٹ فراہم کرنا ہے۔
