لاہور (پنجاب پوسٹ) مریم نواز نے پنجاب کے دیہات میں ڈرینج اور سیوریج کے مسائل ترجیحی بنیادوں پر حل کرنے کا حکم دیتے ہوئے گاؤں کی گلیوں کو پختہ اور خوبصورت بنانے کی ہدایت کی۔
انہوں نے کہا کہ عوام کو ٹوٹی پھوٹی گلیوں اور گندے پانی کی مشکلات سے دوچار نہیں دیکھ سکتی۔ ان کے مطابق ہر گاؤں اور دیہات میں ڈرینج، سیوریج اور پکی گلیوں کی سہولت فراہم کرنا حکومت کی ذمہ داری ہے۔
وزیراعلیٰ پنجاب نے کہا کہ دیہات کے لوگوں کا بھی وسائل پر پورا حق ہے اور حکومت دیہی علاقوں میں بنیادی سہولیات کی فراہمی یقینی بنانے کے لیے اقدامات کر رہی ہے۔
دیہی ترقی کے منصوبوں کی مؤثر نگرانی کے لیے ارکان اسمبلی کو رورل ڈویلپمنٹ پراجیکٹس کی مانیٹرنگ کی ذمہ داری سونپنے پر بھی اتفاق کیا گیا ہے۔
یہ بھی پڑھیں: جماعت اسلامی کا احتجاج، 17 روز بعد حکومت کا رابطہ، مزید 24 گھنٹے مانگ لئے
حکومت کی جانب سے کمیونٹی کی شمولیت کے ذریعے دیہات میں ترقیاتی منصوبوں کو مزید مؤثر بنانے پر توجہ دی جا رہی ہے، تاکہ مقامی سطح پر مسائل کی نشاندہی اور ان کا بروقت حل ممکن ہو سکے۔
وزیراعلیٰ پنجاب مریم نواز نے کہا کہ ”مثالی گاؤں پراجیکٹ میرے دل کے بہت قریب ہے“ اور وہ پنجاب کے ہر گاؤں کی حالت بدلنا چاہتی ہیں۔
انہوں نے کہا کہ دیہی علاقوں کے عوام کو بھی شہری علاقوں کی طرح بنیادی سہولیات کی فراہمی یقینی بنائی جائے گی اور حکومت گاؤں کی سطح پر ترقی اور عوامی فلاح کے منصوبوں کو ترجیح دے رہی ہے۔
