پنجاب کے 3 اضلاع میں فوڈ اتھارٹی کا کریک ڈاؤن، 2300 لیٹر ملاٹی دودھ تلف،دودہ کن اشیاء سے تیار کیا جا رہا تھا؟

لاہور(پنجاب پوسٹ)پنجاب کے مختلف اضلاع میں ملاوٹ مافیا کے خلاف پنجاب فوڈ اتھارٹی کی کارروائیاں جاری ہیں، جہاں شیخوپورہ اور سرگودھا میں ناکہ بندی کے دوران دودھ بردار گاڑیوں کی چیکنگ کرتے ہوئے مجموعی طور پر تقریباً 2300 لیٹر ملاوٹی اور ناقص دودھ برآمد کرکے موقع پر تلف کر دیا گیا۔

شیخوپورہ

شیخوپورہ: پنجاب فوڈ اتھارٹی شیخوپورہ کی فوڈ سیفٹی ٹیموں نے وزیراعلیٰ پنجاب مریم نواز شریف اور ڈی جی پنجاب فوڈ اتھارٹی راجہ منصور احمد کی ہدایات پر ملاوٹ مافیا کے خلاف کارروائیاں مزید تیز کر دیں۔ تحصیل فیروزوالا میں ناکہ بندی کے دوران دودھ سے بھرے ٹینکر کو روک کر چیک کیا گیا تو دودھ کے معیار میں ملاوٹ اور ناقص اجزا کی موجودگی سامنے آئی۔ کارروائی کے دوران ٹینکر سے تقریباً 900 لیٹر ملاوٹی اور مضرِ صحت دودھ برآمد کیا گیا، جسے انسانی صحت کے لیے نقصان دہ قرار دے کر موقع پر ہی تلف کر دیا گیا۔ فوڈ اتھارٹی ٹیم نے قانون کی خلاف ورزی پر دودھ بردار ٹینکر کو قبضے میں لے لیا جبکہ کارروائی میں ملوث افراد کو مزید قانونی کارروائی کے لیے موقع پر پولیس کے حوالے کر دیا گیا۔

سرگودھا

سرگودھا: پنجاب فوڈ اتھارٹی سرگودھا کی جانب سے بھی ناقص اور ملاوٹی دودھ کے خلاف کارروائیاں جاری ہیں۔ فوڈ سیفٹی ٹیم نے بھیرہ انٹرچینج پر ناکہ بندی کرکے دودھ بردار گاڑیوں کی چیکنگ کی۔ اس دوران ایک دودھ بردار گاڑی سے 1400 لیٹر ناقص اور ملاوٹی دودھ برآمد ہوا۔ فوڈ سیفٹی ٹیم نے دودھ کے معیار کو موقع پر ٹیسٹ کیا اور انسانی استعمال کے لیے ناقابلِ استعمال قرار دیے جانے کے بعد پورا دودھ تلف کر دیا۔ حکام کے مطابق دودھ بردار گاڑیوں کی روزانہ کی بنیاد پر چیکنگ کا سلسلہ جاری ہے تاکہ شہریوں کو معیاری اور خالص دودھ کی فراہمی یقینی بنائی جا سکے۔

یہ بھی پڑھیں:پنجاب میں صحت مند اور غذائیت سے بھرپور خوراک کی تیاری کیسے ہوگی؟پنجاب فوڈ اتھارٹی ٹریننگ سکول میں صحت مند غذائیت ریسورس سینٹر کیسے کام کرے گا؟

بھیرہ

بھیرہ:انٹرچینج پر خصوصی ناکہ بندی کے دوران پنجاب فوڈ اتھارٹی کی ٹیموں نے متعدد دودھ بردار گاڑیوں کو روک کر دودھ کے معیار اور خالص پن کی جانچ کی۔ کارروائی کے دوران ایک گاڑی سے بڑی مقدار میں ناقص اور ملاوٹی دودھ برآمد ہوا، جسے جدید ٹیسٹنگ کے ذریعے چیک کرنے کے بعد 1400 لیٹر دودھ موقع پر تلف کر دیا گیا۔ پنجاب فوڈ اتھارٹی حکام کا کہنا ہے کہ دودھ بردار گاڑیوں کی نگرانی اور چیکنگ کا عمل مسلسل جاری رہے گا، جبکہ شہری ملاوٹ یا ناقص خوراک سے متعلق شکایات ہیلپ لائن 1223 پر درج کرا سکتے ہیں۔

مجموعی طور پر شیخوپورہ اور سرگودھا کے علاقوں میں کارروائیوں کے دوران تقریباً 2300 لیٹر ملاوٹی و ناقص دودھ تلف کیا گیا، جبکہ فوڈ اتھارٹی نے واضح کیا ہے کہ شہریوں کو محفوظ، خالص اور معیاری خوراک کی فراہمی تک ملاوٹ مافیا کے خلاف بلاامتیاز کارروائیاں جاری رہیں گی۔

یہ بھی پڑھیں:25 لاکھ سے 20 کروڑ تک کمانے والے صرف 1 فیصد ٹیکس دیں، حکومتی اعلان کے بعد ننکانہ صاحب میں دکانداروں کی لائنیں کیوں لگ گئیں؟