کٹورا نہیں قلم، ٹریفک پولیس کا بھکاریوں کیخلاف آپریشن، لاہور سے سہولت کار کیسے کئے گرفتار؟

لاہور(پنجاب پوسٹ)میں پیشہ ور گداگری کے خاتمے کے لیے پولیس نے بڑے پیمانے پر کریک ڈاؤن کرتے ہوئے 80 گداگروں کو گرفتار کر لیا۔ شہر بھر میں جاری اس کارروائی کے دوران متعدد مقدمات بھی درج کیے گئے، جبکہ سی سی پی او لاہور نے واضح کیا ہے کہ گداگری کے خلاف زیرو ٹالرنس پالیسی پر عمل کرتے ہوئے بھکاری مافیا اور ان کے سہولت کاروں کے گرد گھیرا مزید تنگ کیا جائے گا۔
ترجمان لاہور پولیس کے مطابق شہر میں انسدادِ گداگری مہم کے تحت حالیہ کارروائیوں میں 80 پیشہ ور گداگروں کو گرفتار کر کے ان کے خلاف مقدمات درج کر لیے گئے ہیں۔ رواں سال کے دوران اب تک گداگری میں ملوث مجموعی طور پر 755 افراد کو گرفتار کیا جا چکا ہے۔
پولیس کے مطابق گرفتار ہونے والوں میں 748 مرد، 6 خواتین اور ایک سہولت کار شامل ہے، جبکہ مختلف علاقوں میں پیشہ ور گداگروں اور ان کے نیٹ ورک کے خلاف کارروائیاں مسلسل جاری ہیں۔

یہ بھی پڑھیں:لاہور: ماڈل ٹاؤن کچہری سے کروڑوں روپے مالیت کی منشیات سمیت غیر ملکی شہری گرفتار، کس ملک سے تعلق تھا؟

سی سی پی او لاہور بلال صدیق کمیانہ نے کہا ہے کہ صوبائی دارالحکومت کو گداگری جیسی سماجی برائی سے پاک کرنے کے لیے تمام دستیاب وسائل بروئے کار لائے جا رہے ہیں۔ ان کا کہنا تھا کہ گداگری کے خلاف زیرو ٹالرنس پالیسی اپنائی گئی ہے اور اس مکروہ دھندے میں ملوث عناصر کو قانون کے کٹہرے میں لایا جائے گا۔انہوں نے کہا کہ معصوم بچوں کے ہاتھوں سے قلم چھین کر انہیں گداگری پر مجبور کرنے والوں کے خلاف بھی سخت کارروائی کی جا رہی ہے اور ایسے عناصر کو ہر صورت کیفرِ کردار تک پہنچایا جائے گا۔
سی سی پی او نے ٹریفک پولیس کو بھی ہدایت کی ہے کہ اہم شاہراہوں، چوراہوں اور ٹریفک سگنلز پر بھکاری مافیا کے خلاف کارروائیاں مزید تیز کی جائیں، جبکہ پنجاب سیف سٹیز اتھارٹی کے جدید کیمرہ نیٹ ورک کے ذریعے پیشہ ور گداگروں اور ان کے سہولت کاروں کی مسلسل نگرانی بھی کی جائے گی۔