لاہور(پنجاب پوسٹ) میں ایس پی کینٹ اختر نواز کی ہدایت پر منشیات فروشوں کے خلاف جاری کریک ڈاؤن کے دوران غازی آباد پولیس نے اہم کارروائی کرتے ہوئے علاقے کے بدنام زمانہ منشیات فروش علی ارشد کو گرفتار کر لیا۔ پولیس کے مطابق ملزم اسلحہ کے زور پر منشیات فروخت کرتا تھا اور مختلف علاقوں میں جدید طریقہ کار کے تحت منشیات کی سپلائی بھی کرتا رہا۔ کارروائی خفیہ اطلاع پر عمل میں لائی گئی، جس کے دوران ملزم کو اسلحہ اور منشیات سمیت گرفتار کر کے تھانے منتقل کر دیا گیا۔
پولیس حکام کے مطابق گرفتار ملزم علی ارشد کے قبضے سے ایک کلاشنکوف، دو رائفلیں اور 230 گرام آئس برآمد کی گئی۔ ابتدائی تفتیش کے دوران ملزم نے اعتراف کیا کہ وہ آن لائن لوکیشن کے ذریعے گاہکوں تک منشیات پہنچاتا تھا۔ پولیس کا کہنا ہے کہ ملزم کافی عرصے سے منشیات فروشی کے دھندے میں ملوث تھا اور اس کے خلاف مزید شواہد بھی اکٹھے کیے جا رہے ہیں۔
ایس پی کینٹ اختر نواز نے بتایا کہ ملزم کے انکشافات کی روشنی میں اس کے دیگر ساتھیوں، سہولت کاروں اور منشیات کے نیٹ ورک سے وابستہ افراد کی گرفتاری کے لیے انٹیلیجنس بیسڈ آپریشنز جاری ہیں۔ پولیس کی مختلف ٹیمیں ممکنہ ٹھکانوں پر چھاپے مار رہی ہیں تاکہ پورے نیٹ ورک کا خاتمہ کیا جا سکے۔
ایس پی کینٹ نے کامیاب کارروائی پر غازی آباد پولیس ٹیم کو شاباش دیتے ہوئے کہا کہ لاہور پولیس نوجوان نسل کو منشیات جیسے ناسور سے محفوظ رکھنے کے لیے بھرپور اقدامات کر رہی ہے۔ انہوں نے کہا کہ منشیات فروش معاشرے کے دشمن ہیں اور ان کے خلاف زیرو ٹالرنس پالیسی کے تحت بلاامتیاز کارروائیاں جاری رہیں گی۔ شہریوں کے جان و مال کے تحفظ اور منشیات کے خاتمے کے لیے تمام دستیاب وسائل بروئے کار لائے جا رہے ہیں، جبکہ عوام سے بھی اپیل کی گئی ہے کہ وہ اپنے علاقوں میں منشیات فروشی یا دیگر جرائم سے متعلق معلومات فوری طور پر پولیس کے ساتھ شیئر کریں تاکہ ایسے عناصر کے خلاف مؤثر کارروائی عمل میں لائی جا سکے۔
