لاہور( پنجاب پوسٹ ) لٹن روڈ پولیس نے کارروائی کرتے ہوئے جعلی پرائس کنٹرول مجسٹریٹ بن کر دکانداروں سے بھتہ وصول کرنے والے ملزم کو رنگے ہاتھوں گرفتار کر لیا۔
پولیس کے مطابق گرفتار ملزم کی شناخت اکرام کے نام سے ہوئی ہے، جو کئی ماہ سے خود کو پرائس کنٹرول مجسٹریٹ ظاہر کرکے مختلف دکانوں پر جاتا تھا۔ ملزم سرکاری ریٹ لسٹ چیک کرنے کے بہانے دکانوں میں داخل ہوتا اور ریٹ لسٹ میں مبینہ بے ضابطگیوں کا ڈراوا دے کر دکانداروں سے بھاری رقوم بٹورتا تھا۔
یہ بھی پڑھیں : لاہور میں غیر قانونی ڈرائیونگ اسکولز کے خلاف کریک ڈاؤن، سی ٹی او کا سخت ایکشن
پولیس کا کہنا ہے کہ ابتدائی تفتیش کے دوران ملزم نے اعتراف کیا کہ وہ کئی مہینوں سے جعلی سرکاری افسر بن کر دکانداروں کو لوٹ رہا تھا۔
پولیس نے ملزم کے خلاف دھوکہ دہی، جعل سازی اور دیگر متعلقہ دفعات کے تحت مقدمہ درج کر کے مزید تفتیش شروع کر دی ہے تاکہ اس کے دیگر ساتھیوں اور متاثرہ افراد کا بھی سراغ لگایا جا سکے۔
ایس پی سول لائنز چوہدری اثر علی نے کہا کہ عوام کی جیبوں پر ڈاکا ڈالنے والے کسی رعایت کے مستحق نہیں، ایسے عناصر کے خلاف بلاامتیاز کارروائیاں جاری رہیں گی۔
