لاہور(پنجاب پوسٹ) پاکستان پیپلز پارٹی لاہور نے 25 جولائی کو مینارِ پاکستان پر ہونے والے جلسہ عام کی تیاریوں کے سلسلے میں مشعل بردار ریلی کا انعقاد کیا، جس کی قیادت لاہور کے صدر فیصل میر نے کی۔ ریلی میں پارٹی رہنماؤں اور کارکنوں کی بڑی تعداد نے شرکت کی اور جلسے کو کامیاب بنانے کے عزم کا اظہار کیا۔ریلی میں جنرل سیکرٹری ڈاکٹر عائشہ شوکت، شائدہ جبیں، میاں شاہد عباس، مجید غوری، خرم فاروق، آغا تقی، عامر نصیر بٹ، احمد گھمن اور اسجد ملک سمیت دیگر رہنما بھی شریک ہوئے۔
اس موقع پر فیصل میر نے کہا کہ مشعل بردار مارچ پارٹی کی انتخابی و عوامی سرگرمیوں کا آغاز ہے اور 25 جولائی تک مختلف پروگرام جاری رہیں گے۔ انہوں نے کہا کہ 1986 میں محترمہ بے نظیر بھٹو نے بھی مینارِ پاکستان پر تاریخی جلسہ کیا تھا اور پیپلز پارٹی دوبارہ اسی عوامی قوت کے ساتھ ابھرے گی۔
انہوں نے کہا کہ پیپلز پارٹی عوامی فلاح کے ایجنڈے پر عمل کرتے ہوئے بے روزگار نوجوانوں اور محنت کش طبقے کے لیے سماجی تحفظ کا جامع روڈ میپ پیش کرے گی۔ ان کا کہنا تھا کہ پارٹی لاہور سے کشمیر کی دونوں نشستیں جیتنے کی صلاحیت رکھتی ہے۔
میڈیا سے گفتگو کرتے ہوئے فیصل میر نے کہا کہ 25 جولائی کا جلسہ ہر صورت منعقد ہوگا۔ انہوں نے دعویٰ کیا کہ لاہور میں پیپلز پارٹی کا تنظیمی نیٹ ورک دیگر بڑی جماعتوں سے زیادہ مضبوط ہے اور آئندہ بلدیاتی انتخابات میں تمام یونین کونسلوں میں پارٹی اپنے امیدوار میدان میں اتارے گی۔
ریلی کے دوران کارکنوں نے "ورکر کنونشن ہو کے رہے گا” اور "ہر گھر سے بھٹو نکلے گا” کے نعرے لگائے جبکہ پارٹی ترانوں پر بھرپور جوش و خروش کا مظاہرہ کیا۔
