لاہور(پنجاب پوسٹ)پنجاب ڈیزاسٹر مینجمنٹ اتھارٹی (پی ڈی ایم اے) نے صوبے بھر میں مون سون بارشوں کے دوسرے اسپیل کے پیش نظر الرٹ جاری کرتے ہوئے 19 سے 23 جولائی تک بیشتر اضلاع میں تیز ہواؤں، گرج چمک اور موسلادھار بارشوں کی پیشگوئی کی ہے۔ ادارے نے ضلعی انتظامیہ اور متعلقہ محکموں کو ہنگامی صورتحال سے نمٹنے کے لیے پیشگی اقدامات یقینی بنانے کی ہدایت بھی جاری کر دی ہے۔
پی ڈی ایم اے کے مطابق، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ، حافظ آباد، وزیرآباد، فیصل آباد، خوشاب، سرگودھا، لاہور، شیخوپورہ، سیالکوٹ، نارووال، ساہیوال، جھنگ، ٹوبہ ٹیک سنگھ، ننکانہ صاحب اور چنیوٹ میں موسلادھار بارش کا امکان ہے۔ جبکہ نورپور تھل، بھکر، میانوالی، لیہ، بہاولپور، بہاولنگر، ڈیرہ غازی خان، ملتان، خانیوال، لودھراں، مظفرگڑھ، کوٹ ادو، رحیم یار خان اور راجن پور میں 20 سے 24 جولائی کے دوران بارشیں متوقع ہیں۔
ادارے نے راولپنڈی، گوجرانوالہ، لاہور، سیالکوٹ، فیصل آباد اور ملتان میں اربن فلڈنگ کا خدشہ ظاہر کیا ہے، جبکہ نالہ لئی، کشمیر، مری، گلیات اور شمال مشرقی پنجاب کے برساتی نالوں میں طغیانی اور فلیش فلڈنگ کے امکانات بھی ظاہر کیے گئے ہیں۔
ڈی جی پی ڈی ایم اے عمر عباس میلہ نے تمام کمشنرز اور ڈپٹی کمشنرز کو الرٹ رہنے کی ہدایت کرتے ہوئے کہا کہ وزیراعلیٰ پنجاب کی ہدایت پر ضلعی انتظامیہ سمیت محکمہ صحت، آبپاشی، تعمیر و مواصلات، لوکل گورنمنٹ اور لائیو اسٹاک کے محکموں کو بھی الرٹ کر دیا گیا ہے تاکہ کسی بھی ہنگامی صورتحال سے مؤثر انداز میں نمٹا جا سکے۔
پی ڈی ایم اے نے شہریوں کو خراب موسم میں غیر ضروری سفر سے گریز، آندھی اور طوفان کے دوران محفوظ مقامات پر رہنے، آسمانی بجلی سے بچاؤ کی احتیاطی تدابیر اختیار کرنے اور بچوں کو نشیبی علاقوں، جمع پانی اور بجلی کے کھمبوں یا تاروں کے قریب نہ جانے دینے کی ہدایت کی ہے۔ کسی بھی ہنگامی صورتحال میں شہریوں کو پی ڈی ایم اے ہیلپ لائن 1129 پر رابطہ کرنے کا کہا گیا ہے۔
