گوجرانوالہ (پنجاب پوسٹ) مریدکے کے قریب جی ٹی روڈ پر نامعلوم کار سوار حملہ آوروں کی فائرنگ کے نتیجے میں مسلم لیگ ن کے مقامی رہنما اور سابق چیئرمین بلدیہ شیخ شبیر احمد جاں بحق ہو گئے جب کہ گوجرانوالہ سے مسلم لیگ ن کے رکن قومی اسمبلی محمود بشیر ورک بھی طویل علالت کے بعد انتقال کرگئے۔ پولیس ذرائع کے مطابق مقتول شیخ شبیر احمد اپنی فلور ملز سے کار میں سوار ہو کر لاہور میں واقع اپنی رہائش گاہ کی طرف روانہ ہوئے تھے کہ جب وہ جی ٹی روڈ پر مریدکے کے قریب پہنچے تو پہلے سے گھات لگائے بیٹھے نامعلوم مسلح ملزمان نے ان کی گاڑی کو نشانہ بناتے ہوئے اندھا دھند فائرنگ کردی۔
بتایا گیا ہے کہ فائرنگ کے نتیجے میں شیخ شبیر احمد شدید زخمی ہو گئے اور زخموں کی تاب نہ لاتے ہوئے موقع پر یا ہسپتال منتقلی کے دوران دم توڑ گئے جب کہ حملہ آور فائرنگ کرنے کے بعد باآسانی موقع سے فرار ہونے میں کامیاب ہو گئے، واقعے کی اطلاع ملتے ہی پولیس کی بھاری نفری موقع پر پہنچ گئی، پولیس نے لاش کو فوری طور پر پوسٹ مارٹم کے لیے تحصیل ہیڈ کوارٹر ہسپتال مریدکے منتقل کردیا اور شواہد اکٹھے کرنا شروع کردیئے۔
یہ بھی پڑھیں؛ پاکستان اور برطانیہ کے درمیان ثقافتی روابط کو مزید فروغ دینے کیلئے کوشاں، عظمیٰ بخاری
پولیس کا کہنا ہے کہ ملزمان کی شناخت اور گرفتاری کے لیے راستوں میں لگے سی سی ٹی وی کیمروں کی فوٹیج کی مدد لی جا رہی ہے، ابتدائی طور پر اس لرزہ خیز واقعے کو دیرینہ دشمنی کا شاخسانہ قرار دیا جارہا ہے، تاہم تمام زاویوں سے تحقیقات کا آغاز کرکے قاتلوں کی تلاش کے لیے چھاپے مارے جا رہے ہیں۔ دوسری طرف مریدکے میں سابق چیئرمین بلدیہ شیخ شبیر احمد کے اندوہناک قتل کے بعد گوجرانوالہ سے مسلم لیگ ن کے رکن قومی اسمبلی محمود بشیر ورک بھی طویل علالت کے بعد انتقال کرگئے۔
اہلِ خانہ کی جانب سے تصدیق کی گئی ہے کہ محمود بشیر ورک طویل عرصے سے کینسر کی موذی بیماری میں مبتلا تھے اور لاہور کے ایک نجی ہسپتال میں زیرِ علاج تھے، وہ جانبر نہ ہو سکے اور خالقِ حقیقی سے جا ملے، مرحوم کی نمازِ جنازہ آج صبح ان کے آبائی علاقے میں ادا کر دی گئی، جس کے بعد انہیں ان کے آبائی قبرستان میں سپردِ خاک کر دیا گیا۔
