حمزہ شہباز: وزیراعظم شہباز شریف کی قیادت میں پاکستان کا عالمی تشخص مضبوط ہو رہا ہے

لاہور(پنجاب پوسٹ)سابق وزیراعلیٰ پنجاب حمزہ شہباز شریف نے صحافیوں سے غیر رسمی گفتگو کرتے ہوئے کہا کہ وزیراعظم شہباز شریف کی محنت، لگن اور مخلصانہ قیادت کے باعث پاکستان کا نام دنیا بھر میں نمایاں ہو رہا ہے۔ انہوں نے کہا کہ حکومت کی مثبت پالیسیوں کے نتیجے میں عالمی سطح پر پاکستان کی شناخت اور ساکھ میں بہتری آئی ہے جبکہ مختلف خطوں میں بھی پاکستان کو مثبت انداز میں دیکھا جا رہا ہے۔

یہ بھی پڑھیں:ایم ایس پروگرام میں داخلہ کیوں نہ ملا؟ لاہور ہائیکورٹ کی جی سی یونیورسٹی انتظامیہ سے وضاحت طلب

حمزہ شہباز شریف نے کہا کہ وزیراعظم شہباز شریف کی نیت ملک و قوم کی خدمت ہے اور اللہ تعالیٰ کے کرم سے ترقی کے راستے ہموار ہو رہے ہیں۔ انہوں نے کہا کہ کسی بھی سیاسی جماعت کی اصل طاقت اس کے کارکن ہوتے ہیں، کیونکہ کارکن ہی پارٹی کی شناخت، قوت اور عوام تک رسائی کا ذریعہ بنتے ہیں۔ ان کا کہنا تھا کہ اگر کارکن نہ ہوں تو سیاسی جماعت اپنی حقیقی حیثیت برقرار نہیں رکھ سکتی۔
انہوں نے مزید کہا کہ پارٹی کارکن شدید گرمی، سردی، دھوپ اور دیگر موسمی سختیوں کا سامنا کرتے ہوئے جماعت کو متحرک اور مضبوط رکھتے ہیں۔ انہوں نے کارکنوں کی قربانیوں اور جدوجہد کو خراج تحسین پیش کرتے ہوئے کہا کہ سیاسی جماعتوں کی کامیابی میں کارکنوں کا کردار بنیادی اہمیت رکھتا ہے۔