لاہور (پنجاب پوسٹ) پنجاب میں ٹریفک پولیس کے اقدامات کے باعث جان لیوا ٹریفک حادثات میں 35 فیصد کمی ریکارڈ کی گئی ہے۔ رواں سال کے پہلے دس ماہ کے دوران صوبے کے تین اضلاع خوشاب، مظفرگڑھ اور مری میں کوئی جان لیوا ٹریفک حادثہ رپورٹ نہیں ہوا۔
ترجمان ٹریفک پولیس پنجاب کے مطابق مؤثر حکمت عملی کے باعث صوبے کے 28 اضلاع میں دس یا اس سے کم مہلک ٹریفک حادثات رپورٹ ہوئے۔ جنوبی پنجاب کے 13 اضلاع میں پہلے دس ماہ کے دوران مجموعی طور پر 92 جان لیوا حادثات پیش آئے، جن میں سب سے زیادہ 36 حادثات ملتان جبکہ 13 ڈیرہ غازی خان میں رپورٹ ہوئے۔
ڈی آئی جی ٹریفک پنجاب کے مطابق وزیراعلیٰ مریم نواز شریف کے وژن کے تحت انسانی جانوں کا تحفظ اور شاہراہوں کو محفوظ بنانا اولین ترجیح ہے۔ صوبے بھر میں ٹریفک حادثات کی روک تھام کے لیے خصوصی اقدامات جاری ہیں۔
ہیڈ آف ٹریفک پولیس پنجاب نے تمام سی ٹی اوز اور ڈی ٹی اوز کو ہدایت کی ہے کہ حادثات کے خطرناک مقامات کی نشاندہی کرکے وہاں حفاظتی اقدامات یقینی بنائے جائیں۔ تیز رفتاری، بغیر لائسنس ڈرائیونگ اور ٹریفک قوانین کی خلاف ورزی کرنے والوں کے خلاف کارروائیاں بھی مزید تیز کرنے کی ہدایت کی گئی ہے۔
حکام نے شہریوں سے اپیل کی ہے کہ ٹریفک قوانین کی پابندی کریں تاکہ قیمتی انسانی جانوں کو محفوظ بنایا جا سکے۔
