لاہور (پنجاب پوسٹ ) وزیراعلیٰ پنجاب مریم نواز شریف سے ضلع خانیوال کے صوبائی ارکان اسمبلی نے ملاقات کی، جس میں عوامی مسائل، ترقیاتی منصوبوں اور ٹرانسپورٹ کی سہولیات پر تفصیلی بات ہوئی۔
ملاقات میں ارکان صوبائی اسمبلی عامر حیات ہراج، چوہدری ضیاء الرحمن، رانا محمد سلیم، اکبر حیات ہراج، رانا بابر حسین عابد، اسامہ فضل اور اصغر حیات ہراج شریک تھے۔
وزیراعلیٰ مریم نواز شریف نے ارکان اسمبلی کے پیش کردہ عوامی مسائل کے حل کیلئے فوری اقدامات کا حکم جاری کر دیا ۔ اس موقع پر تلمبہ اور میاں چنوں سمیت ضلع خانیوال کے دیگر علاقوں میں بھی الیکٹرو بس سروس لانے کا اعلان کر دیا گیا ہے ۔
ارکان صوبائی اسمبلی نے وزیراعلیٰ مریم نواز شریف کو ملتان، وہاڑی روڈ کی تعمیر کی کاوش پر سراہا اور ساتھ ہی خانیوال میں الیکٹرو بس سروس کا آغاز کرنے پر حراج تحسین پیش کیا۔
مزید پڑھیں:اچھرہ ٹیوشن سینٹر سے بچی کی لاش: زیادتی نہیں ہوئی رسی پر کس کی انگلیوں کے نشان تھے؟
عامر حیات ہراج کا کہنا تھا کہ خانیوال کے عوام پاکستان کی جدید ترین بس سروس کے آغاز پر وزیراعلیٰ کو سلام پیش کرتے ہیں، جبکہ رانا محمد سلیم نے کہا کہ الیکٹرو بس کا اجرا نئے اور جدید ٹرانسپورٹ کلچر کی بنیاد ہے۔
اکبر حیات ہراج نے کہا کہ کبیروالا اور گردونواح کے عوام کے لیے الیکٹرو بس کسی نعمت سے کم نہیں، جبکہ چوہدری ضیاء الرحمن کا کہنا تھا کہ جہانیاں کے عوام بھی اس سہولت پر وزیراعلیٰ کے ممنون ہیں۔
وزیراعلیٰ مریم نواز شریف نے اس موقع پر کہا کہ خانیوال، جہانیاں اور کبیروالا میں الیکٹرو بس عوام کا حق ہے، کسی پر احسان نہیں۔ انہوں نے مزید کہا کہ صوبہ بھر کے عوام کے لیے 1500 الیکٹرو بسیں لائی جا رہی ہیں اور یہ منصوبہ صرف ایک سہولت نہیں بلکہ جدید ٹرانسپورٹ کلچر کا آغاز ہے۔
مزید یہ کہ مریم نواز شریف نےخالق آباد، تلمبہ روڈ اور ایس ایم لنک کے شکستہ پل کی تعمیر و مرمت جلد کرنے کی ہدایت کی ہے۔
