لاہور: غیر ملکی خواتین کے اغوا اور اجتماعی زیادتی کے مقدمے کی تحقیقات میں اہم پیش رفت سامنے آئی ہے، جہاں فرانزک تجزیے کے دوران تین ملزمان کے ڈی این اے متاثرہ خاتون کے نمونوں سے میچ کر گئے ہیں۔
پولیس ذرائع کے مطابق ڈی این اے میچ ہونے والے ملزمان میں نواز سرفہرست ہے۔ ابتدائی تحقیقات کے مطابق ملزم نواز نے مبینہ طور پر سب سے پہلے غیر ملکی خاتون کو زیادتی کا نشانہ بنایا، جبکہ اس کے اکسانے پر دیگر ملزمان نے بھی متاثرہ خاتون کے ساتھ زیادتی کی۔
یہ بھی پڑھیں؛غیر ملکی خواتین کیس: کیا خواتین کیساتھ زیادتی ہوئی؟ میڈیکل رپورٹ سامنے آگئی
تحقیقات کے دوران پولیس نے مجموعی طور پر آٹھ ملزمان کے ڈی این اے نمونے فرانزک لیبارٹری بھجوائے تھے۔ ذرائع کے مطابق تین ملزمان کے ڈی این اے میچ ہونے کی تصدیق ہو چکی ہے، جبکہ دیگر ملزمان کے نمونوں کا فرانزک تجزیہ تاحال جاری ہے۔
پولیس حکام کا کہنا ہے کہ فرانزک رپورٹ کی روشنی میں تفتیش کو مزید آگے بڑھایا جا رہا ہے اور شواہد کی بنیاد پر ملزمان کے خلاف قانونی کارروائی عمل میں لائی جائے گی۔
