لاہور (پنجاب پوسٹ) سینئر صوبائی وزیر مریم اورنگزیب نے کہا ہے کہ پنجاب سوشل اکانومک رجسٹری (PSER) کا صوبہ بھر میں جاری سروے جولائی میں مکمل ہو جائے گا۔ پنجاب کی تاریخ میں پہلی بار ہر فرد، ہر خاندان اور ہر گھرانے کا معاشی ڈیٹا اکٹھا کیا جا رہا ہے تاکہ حکومتی پالیسیاں اور فیصلے حقیقی اعداد و شمار اور ٹھوس شواہد کی بنیاد پر کیے جا سکیں۔
انہوں نے کہا کہ حکومت کا مقصد آبادی کے حجم کے مطابق معیشت، روزگار، تعلیم اور صحت کے شعبوں میں مؤثر منصوبہ بندی اور بہتری لانا ہے۔ وزیراعلیٰ پنجاب مریم نواز شریف کے وژن کے مطابق PSER کو ایک متحرک ادارہ بنایا جا رہا ہے، جہاں جدید ڈیش بورڈز اور پورٹلز کے ذریعے عوام کو بھی معلومات تک رسائی حاصل ہوگی۔
یہ بھی پڑھیں: پنجاب میں ای پروکیورمنٹ سسٹم نافذ، خریداری نظام مکمل ڈیجیٹل
مریم اورنگزیب کا کہنا تھا کہ ملک کے دستیاب وسائل کو مدنظر رکھتے ہوئے آبادی، واٹر سیکیورٹی، تعلیم اور صحت جیسے اہم چیلنجز سے نمٹنے کے لیے درست اور جامع ڈیٹا ناگزیر ہے۔ انہوں نے کہا کہ ہر گھرانے، خاتون اور بچے کی صحت اور غذائیت میں بہتری کے بغیر حقیقی ترقی کا خواب شرمندۂ تعبیر نہیں ہو سکتا۔
