(پنجاب پوسٹ) لاہور میں بجلی کے شدید بحران نے ایک بار پھر سر اٹھا لیا ہے جہاں تقریباً 700 میگاواٹ کے شارٹ فال کے باعث شہر کے مختلف علاقوں میں غیر اعلانیہ لوڈشیڈنگ کا سلسلہ شروع ہو گیا ہے۔ لیسکو کے سسٹم پر بجلی کی مجموعی طلب 5,120 میگاواٹ تک پہنچ چکی ہے جبکہ فراہمی صرف 4,415 میگاواٹ ریکارڈ کی گئی ہے، جس کے باعث طلب و رسد میں واضح فرق پیدا ہو گیا ہے۔
لاہور کے جن علاقوں میں بجلی کا بحران شدت اختیار کر گیا ہے ان میں باغبانپورہ، مغلپورہ، لال پل، فتح گڑھ، ہربنس پورہ، دھرم پورہ، مال روڈ، جیل روڈ، مسلم ٹاؤن موڑ، گلبرگ، ماڈل ٹاؤن، جوہر ٹاؤن، ٹھوکر نیاز بیگ، ملتان روڈ، چوہنگ اور مانگا منڈی سمیت متعدد علاقے شامل ہیں۔
ذرائع کے مطابق بجلی کی طلب میں اضافے کے پیشِ نظر لیسکو انتظامیہ نے لوڈ مینجمنٹ کے تحت تقریباً 800 میگاواٹ تک مختلف فیڈرز بند کر دیے ہیں، جس کے باعث متعدد علاقے اندھیرے میں ڈوب گئے ہیں۔ غیر اعلانیہ لوڈشیڈنگ نے شہریوں کی مشکلات میں کئی گنا اضافہ کر دیا ہے۔
بجلی نا ہونے کے باعث شہر میں پانی کی شدید قلت پیدا ہو گئی ہے جبکہ گیس کا بحران بھی شدت اختیار کر گیا ہے۔ بوسیدہ ٹرانسفارمرز اور ناقص انفراسٹرکچر کے باعث کئی علاقوں میں بیک وقت بجلی، پانی اور گیس کی فراہمی متاثر ہو رہی ہے، جس نے شہریوں کو شدید اذیت میں مبتلا کر دیا ہے
