لاہور: (پنجاب پوسٹ)29 جون — لاہور میں بجلی چوری کے خلاف جاری کریک ڈاؤن مزید تیز کر دیا گیا ہے۔ ترجمان لاہور پولیس کے مطابق رواں سال مختلف کارروائیوں کے دوران 9 ہزار 600 سے زائد بجلی چوروں کو گرفتار کیا گیا، جبکہ شہر کے مختلف تھانوں میں بجلی چوری کے 8 ہزار 694 مقدمات بھی درج کیے گئے ہیں۔
سی سی پی او لاہور بلال صدیق کمیانہ نے کہا ہے کہ قومی وسائل کا تحفظ حکومت اور قانون نافذ کرنے والے اداروں کی اولین ترجیح ہے۔ انہوں نے واضح کیا کہ بجلی چوری جیسے ناسور کے خاتمے کے لیے متعلقہ اداروں، بالخصوص لیسکو، کے ساتھ مکمل تعاون جاری رکھا جائے گا اور کسی بھی بجلی چور یا اس کی سہولت کاری کرنے والے کو قانون سے بالاتر نہیں سمجھا جائے گا۔
یہ بھی پڑھیں:پی سی بی نے ڈومیسٹک کرکٹ کے ڈیپارٹمنٹل ٹورنامنٹس سیزن 2026-27 کا شیڈول جاری کر دیا
انہوں نے بتایا کہ لیسکو اور لاہور پولیس کی مشترکہ ٹیمیں روزانہ کی بنیاد پر مختلف علاقوں میں کارروائیاں کر رہی ہیں تاکہ بجلی چوری کی روک تھام کو یقینی بنایا جا سکے۔ سی سی پی او نے ہدایت کی کہ بجلی چوری کے مقدمات کی تفتیش جلد مکمل کر کے چالان بلا تاخیر عدالتوں میں جمع کروائے جائیں تاکہ ملزمان کو قانون کے مطابق سزا دلائی جا سکے۔
بلال صدیق کمیانہ نے مزید کہا کہ صرف بجلی چور ہی نہیں بلکہ بجلی چوری میں استعمال ہونے والی غیر قانونی ڈیوائسز تیار کرنے والے عناصر کے خلاف بھی سخت قانونی کارروائی عمل میں لائی جائے گی۔ انہوں نے شہریوں سے اپیل کی کہ اگر انہیں اپنے علاقے میں بجلی چوری کی کوئی اطلاع ملے تو فوری طور پر پولیس یا متعلقہ اداروں کو آگاہ کریں تاکہ بروقت کارروائی کر کے قومی خزانے کو نقصان سے بچایا جا سکے۔
لاہور پولیس کے مطابق بجلی چوری کے خلاف جاری یہ مہم آئندہ بھی پوری شدت کے ساتھ جاری رہے گی اور قومی وسائل کو نقصان پہنچانے والے عناصر کے گرد گھیرا مزید تنگ کیا جائے گا۔
