لاہور (پنجاب پوسٹ)لاہور میں باوردی پولیس اہلکاروں کی جانب سے شہری کو لوٹنے کا افسوسناک واقعہ سامنے آیا ہے، جس پر مقدمہ درج کر کے ملوث اہلکاروں کو گرفتار کر لیا گیا۔
پولیس کے مطابق شہری نے درخواست میں مؤقف اختیار کیا کہ وہ اپنے گھر جا رہا تھا کہ تماثیل تھیٹر کے قریب فیروزپور روڈ پر دو پولیس اہلکاروں نے اسے روک لیا۔ مدعی کے مطابق اہلکاروں نے اسے زدوکوب کیا اور جیب سے ساڑھے آٹھ ہزار روپے زبردستی نکال لیے، جبکہ ایک اہلکار نے شرٹ کے نیچے اسلحہ بھی چھپا رکھا تھا
یہ بھی پڑھیں: پٹرولیم مصنوعات کی بڑھتی قیمتیں، جماعت اسلامی کا 7 اگست کو سڑک بند احتجاج کا اعلان
پولیس کا کہنا ہے کہ دونوں اہلکاروں کو گرفتار کر لیا گیا ہے، جبکہ ان میں سے ایک پہلے ہی محکمہ پولیس سے برطرف کیا جا چکا تھا۔
حکام کے مطابق واقعے کا مقدمہ درج کر کے مزید تفتیش شروع کر دی گئی ہے، جبکہ ملزمان کے خلاف قانون کے مطابق سخت کارروائی عمل میں لائی جائے گی۔
