لاہور میں سموگ 2023 کی نسبت 60 فیصد بہتر ،سینہ،دمہ اور آنکھوں کے امراض میں 21 فیصد کمی ہوئی ہے ،مریم اورنگزیب کا دعویٰ

لاہور(پنجاب پوسٹ) سینئر صوبائی وزیر پنجاب مریم اورنگزیب نے کہا ہے کہ لاہور میں فضائی آلودگی کی موجودہ صورتحال 2023 کے مقابلے میں 60 فیصد سے زائد بہتر ہے۔ ان کے مطابق اسی عرصے میں سینے، دمے اور آنکھوں کے امراض کے مریضوں کی رپورٹنگ میں 21 فیصد کمی آئی ہے۔ ایئر کوالٹی کی صورتحال پر پریس کانفرنس کرتے ہوئے انہوں نے اس بہتری کو وزیراعلیٰ مریم نواز کی سرپرستی میں گزشتہ دو سال کے اقدامات کا نتیجہ قرار دیا۔

یہ بھی پڑھیں:اینٹی اسموگ گنز کی مؤثر کارروائیاں، لاہور میں ایئر کوالٹی انڈیکس 53 فیصد تک کم ہوگیا، شہر کے تمام 11 مانیٹرنگ اسٹیشنز پر نمایاں بہتری ریکارڈ

"سموگ پر سیاست نہیں ہونی چاہیے”

مریم اورنگزیب نے کہا کہ سموگ کے معاملے پر سیاست نہیں کرنی چاہیے۔ ان کا کہنا تھا کہ 2024 سے پہلے کی صورتحال پر وہ بھی سیاست کر سکتی ہیں، مگر وہ ایسا نہیں کرنا چاہتیں۔ انہوں نے بتایا کہ وہ انسٹاگرام پر دیکھ رہی ہیں کہ صورتحال کے بارے میں کیا کہا جا رہا ہے، لیکن ان کے بقول پوسٹیں لگانے سے مسائل حل نہیں ہوتے۔

2024 سے پہلے اور اب کا موازنہ

سینئر وزیر نے کہا کہ 2024 میں ماحولیاتی معاملات دیکھنے کا کوئی باقاعدہ نظام موجود نہیں تھا، جبکہ آج تقریباً ایک ہزار افراد پر مشتمل ٹیم کام کر رہی ہے۔ انہوں نے یاد دلایا کہ لاہور کے علاقے گلبرگ میں پہلے سموگ کا لیول دو ہزار سے اوپر چلا جاتا تھا اور شہر پر سموگ کے کالے بادل چھائے رہتے تھے۔ ان کے مطابق سٹبل برننگ (فصلوں کی باقیات جلانے) کے حوالے سے بھی 2024 سے پہلے کوئی نظام موجود نہیں تھا۔

یکم سے 15 نومبر کا وقت اہم

مریم اورنگزیب نے کہا کہ یکم نومبر سے 15 نومبر تک کا وقت انتہائی اہم ہوتا ہے۔ ان کا کہنا تھا کہ حکومت کے پاس پورا ڈیٹا موجود ہے کہ اگر کارروائیاں نہ ہوں تو آلودگی کو کنٹرول نہیں کیا جا سکتا، اور مقامی آلودگی پر قابو نہ پایا جائے تو یہ مزید بڑھ جاتی ہے۔ انہوں نے کہا کہ حکومت ضابطے بناتی ہے اور ان پر عمل کرواتی ہے، اور جو کچھ انسانی طور پر ممکن ہے وہ کیا جا رہا ہے۔ صنعتوں کے حوالے سے ان کا کہنا تھا کہ فیکٹری کی چمنی سے دھواں نہ نکلنا انڈسٹری کی اپنی ذمہ داری ہے۔

اکتوبر کے آخری 18 دن اور سپائک

انہوں نے دعویٰ کیا کہ اکتوبر کے آخری 18 دن چار سال پہلے کے مقابلے میں بہت بہتر رہے۔ واہگہ کے قریبی علاقوں اور بارڈر ایریاز میں آلودگی کے اچانک بڑھنے (سپائک) کا ذکر کرتے ہوئے انہوں نے کہا کہ اس میں مقامی عوامل بھی شامل ہو سکتے ہیں۔ انہوں نے وضاحت کی کہ انہوں نے کبھی یہ دعویٰ نہیں کیا کہ پنجاب میں سٹبل برننگ صفر کر دی گئی ہے۔

دیوالی اور ہمسایہ ممالک کا اثر

مریم اورنگزیب نے کہا کہ ناسا کی تصاویر کے مطابق بھارت میں صورتحال کیا رہی، اور ان تصاویر کا حوالہ دیتے ہوئے کہا کہ دیوالی کی وجہ سے آلودگی میں اضافہ ہوا۔ انہوں نے بتایا کہ کل سموگ کا لیول تقریباً 431 تک گیا تھا جبکہ آج تقریباً 230 رہا۔ ان کے مطابق ہوا چلنے سے یہ لیول نیچے آ جاتا ہے۔

انہوں نے میڈیا سے درخواست کی کہ فوگ (دھند) اور سموگ کو آپس میں مکس نہ کیا جائے۔ انہوں نے وزیراعلیٰ کے مؤقف کو دہرایا کہ سموگ پر صرف دوسرے ملک ہی نہیں بلکہ قریبی اضلاع اور دوسرے صوبے بھی اثر ڈالتے ہیں، اور وزیراعلیٰ کا 70 ارب روپے کا منصوبہ اسی سوچ کے تحت ہے۔

تنقید اور مذاق پر ردعمل

سینئر وزیر نے کہا کہ انہیں اور وزیراعلیٰ کو مذاق اڑائے جانے سے کوئی فرق نہیں پڑتا، اور وہ دونوں سنجیدگی سے کام کر رہی ہیں۔

صحت کے اعداد و شمار

مریم اورنگزیب کے مطابق پرائمری لیول پر او پی ڈی اور دیگر شعبوں میں گزشتہ برسوں کے مقابلے میں 69.4 فیصد کم مریض آئے۔ انہوں نے مزید کہا کہ 2023 کے مقابلے میں سینے، دمے اور آنکھوں کے مریضوں کی رپورٹنگ میں 21 فیصد کمی ہوئی ہے۔

یہ بھی پڑھیں:اربوں کا بجٹ، بلند و بانگ دعوے، سموگ میں اضافہ ہو سکتا ہے، مریم اورنگزیب نے ہاتھ کھڑے کر دیے، دیوالی اور انڈیا کو ذمہ دار ٹھہرا دیا