لاہور(پنجاب پوسٹ)دھند کے باعث موٹر ویز کی بندش کی صورت میں شہریوں کے قیمتی وقت اور ایندھن کی بچت کے لیے اب مرکزی شاہراہوں پر پیشگی آگاہی فراہم کی جائے گی۔ ٹریفک حکام کے مطابق پنجاب بھر میں موٹر وے کے تمام داخلی و خارجی راستوں سے قبل موٹر وے کے بند یا کھلے ہونے سے متعلق سائن بورڈز آویزاں کیے جائیں گے، تاکہ شہری سفر شروع کرنے یا موٹر وے کی جانب رخ کرنے سے پہلے ہی صورتحال سے باخبر ہوں۔
ٹریفک حکام کا کہنا ہے کہ دھند کے موسم میں موٹر ویز اکثر اچانک بند کر دی جاتی ہیں، جس کے باعث شہری انٹرچینج پر پہنچ کر گھنٹوں پریشانی کا شکار ہو جاتے ہیں۔ اس مسئلے کے حل کے لیے پنجاب بھر میں تمام انٹرچینجز سے پہلے ہی آگاہی بورڈ لگائے جا رہے ہیں۔
یہ بھی پڑھیں:لاہور ٹریفک پولیس کی اسموگ کے خلاف اکتوبر میں ریکارڈ کارروائیاں، 67 ہزار 914 چالان جاری
لاہور میں سائن بورڈز کی تنصیب
لاہور میں ٹھوکر نیاز بیگ، بابو صابو، سگیاں اور ایسٹرن بائی پاس سے پہلے سائن بورڈ نصب کیے جائیں گے۔ اس کے علاوہ کینال روڈ کی دونوں اطراف میں بھی آگاہی سائن بورڈز لگائے جائیں گے تاکہ شہری بروقت متبادل راستہ اختیار کر سکیں۔
ڈسٹرکٹ ٹریفک افسران کو احکامات
ٹریفک حکام کے مطابق تمام ڈسٹرکٹ ٹریفک افسران کو ہدایت کی گئی ہے کہ وہ سائن بورڈ لگانے کے لیے موزوں مقامات (پوائنٹس) کو نمایاں کریں اور اس حوالے سے رپورٹ پیر تک ڈی آئی جی ٹریفک کو ارسال کریں۔
رواں ماہ تنصیب مکمل کرنے کا ہدف
حکام نے بتایا کہ رواں ماہ کے دوران تمام سائن بورڈز کی تنصیب مکمل کر لی جائے گی۔
موٹر وے حکام کے ساتھ رابطہ
ٹریفک پولیس اور موٹر وے پولیس کے درمیان رابطے کو بہتر بنانے کے لیے ایک واٹس ایپ گروپ بھی تشکیل دے دیا گیا ہے۔ ٹریفک حکام کے مطابق دونوں ادارے اس گروپ کے ذریعے بروقت معلومات ایک دوسرے کو فراہم کریں گے۔
سوشل میڈیا سے معلومات
شہری موٹر وے یا دیگر ٹریفک سے متعلق تازہ ترین معلومات موٹر وے پولیس اور ٹریفک پولیس کے سوشل میڈیا پیجز سے بھی فوری حاصل کر سکتے ہیں۔
یہ بھی پڑھیں؛لاہور میں انسدادِ سموگ آپریشن، 5 صنعتی و تجارتی یونٹس سیل، 42 گاڑیوں کے چالان
