لاہور (پنجاب پوسٹ) پاکستان کرکٹ بورڈ نے سنٹرل کنٹریکٹ میں شامل کھلاڑیوں کو ڈومیسٹک کرکٹ کھیلنے کی شرط سے آگاہ کر دیا۔ ذرائع کے مطابق پی سی بی نے 20 کھلاڑیوں کی سنٹرل کنٹریکٹ کی فہرست تیار کر لی ہے، جس میں شامل کھلاڑیوں کو اپنے کنٹریکٹ کے مطابق مقررہ ڈومیسٹک میچز کھیلنا ہوں گے۔
ذرائع کا کہنا ہے کہ مقررہ ڈومیسٹک میچز نہ کھیلنے کی صورت میں کھلاڑیوں کو معاوضہ ادا نہیں کیا جائے گا۔ ٹیسٹ اسپیشلسٹ کھلاڑیوں کو کسی بھی ٹی ٹوئنٹی لیگ میں شرکت کی اجازت نہیں ہوگی۔
ٹیسٹ اور ون ڈے کنٹریکٹ میں شامل کھلاڑی ایک ٹی ٹوئنٹی لیگ کھیل سکیں گے، جبکہ ون ڈے اور ٹی ٹوئنٹی کنٹریکٹ والے کھلاڑیوں کو دو لیگز میں شرکت کی اجازت ہوگی۔ دوسری جانب ٹی ٹوئنٹی اسپیشلسٹ کھلاڑیوں پر لیگز کھیلنے کی کوئی پابندی عائد نہیں ہوگی۔
ذرائع کے مطابق پی سی بی کی جانب سے سنٹرل کنٹریکٹس کا باضابطہ اعلان آئندہ ایک سے دو روز میں کیے جانے کا امکان ہے۔
