سرگودھا ( پنجاب پوسٹ ) پنجاب حکومت کے احکامات پر صوبے بھر میں ون ڈش قانون پر عمل درآمد یقینی بنانے کے لیے ضلعی انتظامیہ سرگودھا بھی متحرک ہوگئی، جہاں شادی بیاہ کی تقریبات میں قانون کی خلاف ورزی کرنے والے ہوٹلوں اور میرج ہالز کے خلاف کارروائی کا آغاز کردیا گیا ہے۔
ضلعی انتظامیہ کی زیر نگرانی شادی ہالز، ہوٹلوں اور دیگر تقریبات کے مقامات کی نگرانی کا عمل جاری ہے، جبکہ متعلقہ حکام کو ون ڈش قانون پر سختی سے عمل درآمد یقینی بنانے کی ہدایات جاری کی گئی ہیں۔ انتظامیہ کے مطابق شادی تقریبات میں مقررہ قانونی ضوابط کی خلاف ورزی کسی صورت برداشت نہیں کی جائے گی اور اضافی کھانے پیش کرنے یا قانون کی خلاف ورزی کرنے والے میرج ہالز اور ہوٹل مالکان کے خلاف قانونی کارروائی عمل میں لائی جائے گی۔
یہ بھی پڑھیں : قصور: لاکھوں روپے مالیت کی 150 ممنوعہ ڈور کی چرخیاں برآمد، 02 ملزمان گرفتار
انتظامیہ کا کہنا ہے کہ ون ڈش قانون کے نفاذ کا بنیادی مقصد شادی بیاہ کی تقریبات میں غیر ضروری اخراجات کی حوصلہ شکنی کرنا، عوام کو مالی دباؤ سے بچانا اور معاشرے میں سادگی کو فروغ دینا ہے۔ شادیوں پر بڑھتے ہوئے اخراجات کے باعث متوسط اور کم آمدنی والے طبقے کو مشکلات کا سامنا کرنا پڑتا ہے، ایسے میں ون ڈش قانون پر عمل درآمد معاشرتی سطح پر سادگی اور اعتدال کو فروغ دینے میں مددگار ثابت ہوسکتا ہے۔
ضلعی انتظامیہ نے میرج ہالز اور ہوٹل مالکان کو قانون کی پابندی کرنے کی ہدایت کرتے ہوئے واضح کیا ہے کہ خلاف ورزی کی صورت میں ذمہ داران کے خلاف قانونی کارروائی کی جائے گی۔
انتظامیہ نے شہریوں سے بھی اپیل کی ہے کہ وہ شادی بیاہ کی تقریبات میں سادگی اختیار کریں، ون ڈش قانون کی پاسداری کریں اور ایک ذمہ دار شہری ہونے کا ثبوت دیں، کیونکہ قانون کی پاسداری ہی ایک منظم اور خوشحال معاشرے کی ضمانت ہے۔
