حافظ آباد (پنجاب پوسٹ)حافظ آباد میں کشمیری مسلمانوں پر بھارتی مظالم کے خلاف یومِ سیاہ کشمیر منایا گیا۔ اس سلسلے میں ڈسٹرکٹ کمپلیکس میں تقریب اور ریلی کا انعقاد کیا گیا۔
ڈپٹی کمشنر سید حسین بہادر اور ڈی پی او فواد احمد نے پرچم کشائی کی، جبکہ پیرا فورس اور ریسکیو 1122 کے دستوں نے گارڈ آف آنر پیش کیا۔ تقریب میں ضلعی انتظامیہ کے تمام محکموں کے افسران، ملازمین اور معززینِ شہر کی بڑی تعداد نے شرکت کی۔
ڈپٹی کمشنر سید حسین بہادر نے کہا کہ پاکستانی قوم اپنے کشمیری مسلمان بہن بھائیوں کے ساتھ ہے اور پاکستان کا بچہ بچہ ان کے ساتھ کھڑا ہے۔ ان کا کہنا تھا کہ یومِ سیاہ کشمیر منانے کا مقصد کشمیری بہن بھائیوں سے یکجہتی کا اظہار ہے، اور کشمیر کو بھارت کے غیر قانونی تسلط سے آزاد کرانے تک پاکستانیوں کی جدوجہد جاری رہے گی۔
انہوں نے کہا کہ کشمیری مسلمانوں پر بھارتی مظالم کسی صورت قبول نہیں۔ انہوں نے اقوامِ متحدہ سے مطالبہ کیا کہ وہ بھارتی مظالم بند کرائے اور اپنی منظور کردہ قرارداد کے مطابق کشمیریوں کو ان کا حقِ آزادی دلوائے۔
