لاہور (پنجاب پوسٹ) پاکستان پیپلزپارٹی صدر ٹاؤن کے بلدیاتی امیدواروں کا کنونشن منڈیانہ والا، زون 154 میں منعقد ہوا، جس میں پارٹی رہنماؤں، کارکنوں اور امیدواروں کی بڑی تعداد نے شرکت کی۔ کنونشن کی صدارت ثمینہ خالد گھرکی نے کی، جبکہ صدر پیپلزپارٹی لاہور فیصل میر اور مجید غوری مہمانِ خصوصی تھے۔ کنونشن کی میزبانی صدر پیپلزپارٹی صدر ٹاؤن منیر ڈگرا اور صدر زون 154 حاجی امجد علی نے کی۔
کنونشن سے خطاب کرتے ہوئے فیصل میر نے کہا کہ پیپلزپارٹی لاہور بھر میں پانچ ہزار سے زائد بلدیاتی امیدوار میدان میں اتارے گی۔ انہوں نے دعویٰ کیا کہ صدر ٹاؤن اور واہگہ ٹاؤن سے پیپلزپارٹی کے میئر منتخب ہوں گے۔
ثمینہ خالد گھرکی نے اپنے خطاب میں کہا کہ پیپلزپارٹی آئندہ بلدیاتی انتخابات میں صدر ٹاؤن اور واہگہ ٹاؤن کی یونین کونسلوں میں اپنے امیدوار کھڑے کرے گی۔ انہوں نے کہا کہ پارٹی اس حلقے سے قومی اسمبلی اور صوبائی اسمبلی کی اپنی نشستیں واپس حاصل کرے گی۔
مجید غوری نے اپنے خطاب میں کہا کہ پیپلزپارٹی لاہور میں ہر طرح کے بلدیاتی انتخابات لڑنے کے لیے مکمل طور پر تیار ہے۔ انہوں نے خبردار کیا کہ اگر مسلم لیگ ن نے بلدیاتی انتخابات سے راہِ فرار اختیار کی تو پیپلزپارٹی انتخابات کے انعقاد کے لیے تحریک چلائے گی۔
کنونشن میں یہ بھی اعلان کیا گیا کہ پیپلزپارٹی اسکولوں کا انتظام یونین کونسلوں کے حوالے کرے گی۔
کنونشن کے اختتام پر کارکنوں نے پارٹی قیادت کے حق میں نعرے لگائے اور آئندہ بلدیاتی انتخابات کے لیے بھرپور تیاریوں کا عزم ظاہر کیا۔
–
