لاہور (پنجاب پوسٹ) سیشن کورٹ لاہور میں غیر ملکی خاتون ڈیانا سے مبینہ زیادتی کے مقدمے کی سماعت ہوئی، عدالت نے ملزم تنویر کی عبوری ضمانت میں ستائیس اکتوبر تک توسیع کردی۔
ملزم کی جانب سے ایڈووکیٹ صفدر شاہین پیرزادہ عدالت میں پیش ہوئے۔وکیل صفدر شاہین پیرزادہ کے مطابق ضمانت میں توسیع کے بعد تنویر کو کمرہ عدالت سے باہر پولیس نے حراست میں لے لیا۔
وکیل نے مؤقف اختیار کیا کہ عبوری ضمانت کے باوجود ملزم کو حراست میں رکھنا غیر قانونی ہے۔ تنویر کی بازیابی اور اسے عدالت میں پیش کرنے کے لیے اس کے والد نے بھی درخواست دائر کردی۔ڈیانا کے وکیل نے مدعیہ کا بیان ویڈیو لنک کے ذریعے ریکارڈ کرنے کی درخواست دائر کی، عدالت نے درخواست پر دلائل طلب کرلیے۔
فاضل جج نے ملزم تنویر کو کمرہ عدالت میں شامل تفتیش ہونے کا حکم بھی دیا تھا۔ملزم کے وکیل نے خدشہ ظاہر کیا کہ پولیس تنویر کو کسی نئے مقدمے میں ملوث کرکے گرفتار کرنا چاہتی ہے۔ عدالت نے سکیورٹی انچارج کو طلب کرکے ملزم کو گاڑی تک بحفاظت پہنچانے کا حکم دیا تھا۔
عدالت سے باہر نکلنے پر دوبارہ حراست میں لیے جانے کے معاملے پر ملزم کے ساتھیوں اور پولیس کے درمیان شدید ہنگامہ آرائی ہوئی، جھڑپ میں دونوں جانب کے افراد زخمی ہوئے اور متعدد افراد کے کپڑے پھٹ گئے۔مقدمے میں دو ملزمان محسن اور زین پہلے ہی گرفتار ہیں۔ ڈیانا کی درخواست پر تھانہ ڈیفنس سی پولیس نے مقدمہ درج کیا تھا۔
