دہشت گرد جہاں بھی موجود ہوں گے، انہیں سخت جواب دیا جائے گا، فیلڈ مارشل

اسلام آباد(پنجاب پوسٹ) آرمی چیف اور چیف آف ڈیفنس فورسز فیلڈ مارشل سید عاصم منیر نے کور ہیڈ کوارٹرز، پشاور کا دورہ کیا، جہاں انہیں صوبے کی موجودہ سیکیورٹی صورتحال اور انسداد دہشت گردی کی جاری کارروائیوں پر تفصیلی بریفنگ دی گئی۔

آئی ایس پی آر کے مطابق دورے کے دوران فیلڈ مارشل کو موجودہ سیکیورٹی صورتحال، انسداد دہشت گردی کی جاری کارروائیوں، بارڈر مینجمنٹ کے اقدامات اور صوبے میں تعینات فارمیشنز کی آپریشنل تیاریوں سے آگاہ کیا گیا۔

یہ بھی پڑھیں:فیلڈ مارشل کی جانب سے سابق فوجیوں کے اعزاز میں استقبالیہ، ملکی دفاع کیلئے خدمات کو سراہا

دستوں کی پذیرائی

فیلڈ مارشل نے افسران اور جوانوں کے اعلیٰ حوصلے اور پیشہ ورانہ مہارت کو سراہا۔ انہوں نے ہدایت کی کہ خطرات کا مؤثر طریقے سے مقابلہ کرنے کے لیے چوکس رہا جائے اور آپریشنل تیاری کا اعلیٰ معیار برقرار رکھا جائے۔

دہشت گردوں کے خلاف عزم

انہوں نے زور دے کر کہا کہ اسپانسرڈ دہشت گرد تنظیموں کے خلاف مہم بھرپور طریقے سے جاری رکھی جائے گی اور یہ عناصر جہاں کہیں بھی ہوں گے، انہیں بھرپور انداز میں نشانہ بنایا جائے گا۔

شہدا اور عوام کو خراج تحسین

فیلڈ مارشل سید عاصم منیر نے سیکیورٹی فورسز کے شہدا اور غازیوں سمیت پاکستانی عوام کی قربانیوں کو خراج تحسین پیش کیا۔ انہوں نے اس عزم کا اعادہ کیا کہ عوام کی حمایت سے پاکستان دہشت گردوں اور ان کے بگڑے ہوئے نظریات کو ضرور شکست دے گا۔

استقبال

اس سے قبل پشاور آمد پر کور کمانڈر پشاور نے آرمی چیف کا استقبال کیا۔

یہ بھی پڑھیں:دہشت گردی کے خلاف جنگ پوری قومی قوت کے ساتھ جاری رہے گی: فیلڈ مارشل