سیالکوٹ (پنجاب پوسٹ) سیالکوٹ پولیس نے منشیات، ناجائز اسلحہ، ون ویلنگ اور غلط نمبر پلیٹس کے خلاف کریک ڈاؤن کرتے ہوئے گزشتہ 48 گھنٹوں کے دوران 23 مقدمات درج کرکے 23 ملزمان کو گرفتار کر لیا۔ ترجمان پولیس کے مطابق منشیات اور شراب فروشی کے خلاف کارروائیوں میں 13 مقدمات درج کرکے 13 ملزمان کو گرفتار کیا گیا، جن کے قبضے سے 11 کلو 500 گرام چرس اور 30 لیٹر دیسی شراب برآمد ہوئی۔
پولیس نے ناجائز اسلحہ رکھنے والوں کے خلاف کارروائی کرتے ہوئے 7 مقدمات درج کیے اور 7 ملزمان کو گرفتار کیا۔ ملزمان کے قبضے سے 5 پستول اور 2 رائفلیں معہ گولیاں اور کارتوس برآمد کیے گئے۔
دوسری جانب حاجی پورہ اور صدر ڈسکہ پولیس نے کارروائی کرتے ہوئے 2 ون ویلرز کو گرفتار کر لیا، جبکہ حاجی پورہ پولیس نے غلط نمبر پلیٹ لگانے والے موٹر سائیکل سوار کو بھی گرفتار کیا۔
ڈی پی او سیالکوٹ کیپٹن (ر) دوست محمد نے کہا کہ منشیات اور ناجائز اسلحہ کے خلاف کارروائیاں جاری رہیں گی۔
