لاہور (پنجاب پوسٹ) ڈی آئی جی آپریشنز کی ہدایت پر ڈولفن سکواڈ کی جانب سے بین الاضلاعی اشتہاری ملزمان کے خلاف کارروائیاں تیز کر دی گئیں۔ ڈولفن سکواڈ نے سٹاپ اینڈ سرچ کے دوران مشکوک جانتے ہوئے دو افراد کو روک کر چیک کیا اور انسانی اسمگلنگ و ویزہ فراڈ کے مقدمات میں مطلوب ہونے پر گرفتار کر لیا۔
ترجمان ڈولفن سکواڈ کے مطابق گرفتار ملزمان شاہد اور سلطان گوجرانوالہ اور لاہور کی پولیس کو مطلوب تھے۔ ملزمان کو ای پولیس ایپ کے ذریعے چیک کیا گیا تو ان کے خلاف انسانی اسمگلنگ اور ویزہ فراڈ کے مقدمات درج ہونے کا انکشاف ہوا۔
ترجمان کے مطابق دونوں ملزمان گرفتاری سے بچنے کے لیے گزشتہ 10 سال سے روپوش تھے۔ گرفتار ملزمان کو مزید قانونی کارروائی کے لیے تھانہ داتا دربار اور تھانہ اچھرہ پولیس کے حوالے کر دیا گیا ہے۔
ایس پی ڈولفن بلال احمد نے کہا کہ ای پولیس ایپ کی مدد سے اشتہاری ملزمان کے خلاف خصوصی ٹارگٹڈ آپریشن جاری رہے گا، جبکہ جرائم پیشہ عناصر کے خلاف کارروائیاں مزید مؤثر بنائی جائیں گی
