سیالکوٹ(پنجاب پوسٹ) پاسپورٹ آفس کی انٹرنیٹ سروس صبح سے بند ہونے کے باعث دفتری امور متاثر ہو گئے ہیں، جس سے پاسپورٹ بنوانے کے لیے آنے والے شہریوں کو شدید مشکلات کا سامنا ہے۔
دور دراز علاقوں سے آنے والے شہری کام نہ ہونے کے باعث خوار ہوتے رہے اور پریشانی کا شکار نظر آئے۔
پاسپورٹ انتظامیہ کے مطابق پی ٹی سی ایل کی لائن میں خرابی کے باعث 160 مقامات پر انٹرنیٹ سروس متاثر ہونے کا دعویٰ سامنے آیا ہے۔ انتظامیہ کا کہنا ہے کہ انٹرنیٹ کی بندش سے بینکوں کی سروسز بھی متاثر ہو رہی ہیں۔
پاسپورٹ حکام کے مطابق پی ٹی سی ایل انتظامیہ انٹرنیٹ سروس کی بحالی کے لیے کام کر رہی ہے۔ سروس بحال ہوتے ہی پاسپورٹ آفس میں کام دوبارہ شروع کر دیا جائے گا۔ پاسپورٹ انتظامیہ نے شہریوں کو پیش آنے والی پریشانی پر معذرت کی ہے
