لاہور (پنجاب پوسٹ) ایشین ہاکی چیمپئینز ٹرافی میں پاکستانی ٹیم نے بھارت میں کھیلنے سے انکارکر دیا جبکہ بنگلہ دیش کو متبادل کے طور پر شامل کر لیا گیا۔
ایشین ہاکی فیڈریشن نے ایشین ہاکی چیمپئنز ٹرافی کے شیڈول کا اعلان کر دیا، پاکستان کی جگہ بنگلہ دیش کو ٹورنامنٹ میں شامل کر لیا گیا۔ پاکستان ہاکی فیڈریشن نے موجودہ صورتحال کے پیش نظر قومی ٹیم بھارت بھیجنے سے انکار کرتے ہوئے پاکستان کے میچز یا ایونٹ کو نیوٹرل وینیو پر منتقل کرنے کی درخواست کی تھی، تاہم ایشین ہاکی فیڈریشن نے پاکستان کی درخواست قبول نہیں کی۔
ایشین ہاکی چیمپئنز ٹرافی 27 اکتوبر سے 5 نومبر تک بھارت میں کھیلی جائے گی۔ ٹورنامنٹ میں بھارت، ملائیشیا، جاپان، بنگلہ دیش، جنوبی کوریا اور چین کی ٹیمیں شرکت کریں گی۔
ایشین ہاکی چیمپئنز ٹرافی کے میچز بھارتی شہروں جالندھر اور موہالی میں کھیلے جائیں گے، جبکہ ٹورنامنٹ کے برانز میڈل اور گولڈ میڈل کے مقابلے 5 نومبر کو ہوں گے۔ پاکستان کی جگہ بنگلہ دیش کی شمولیت کے بعد ایونٹ میں چھ ٹیمیں ایکشن میں دکھائی دیں گی۔
