لاہور (پنجاب پوسٹ) شاہدرہ ٹاؤن میں پولیس اہلکار کو منشیات کی خریداری کے نام پر مبینہ طور پر ٹریپ کرنے کی کوشش کا معاملہ سامنے آیا ہے، جس پر ڈی آئی جی آپریشنز نے واقعے کی مکمل انکوائری کا حکم دے دیا۔
پولیس ذرائع کے مطابق ایک شخص نے پولیس کانسٹیبل شعیب کو منشیات فراہم کرنے کی پیشکش کی، تاہم اہلکار نے منشیات لینے سے انکار کرتے ہوئے اسے حراست میں لینے کی کوشش کی۔
یہ بھی پڑھیں : سرگودھا مقدمے میں اثر انداز ہونے کیلئے پولیس کو رشوت کی پیشکش، ملزم حوالات پہنچ گیا۔
ذرائع کے مطابق شخص کے مسلسل اصرار کے بعد دونوں کے درمیان تلخ کلامی ہوئی، جو بعد ازاں مبینہ طور پر ہاتھا پائی تک پہنچ گئی۔ واقعے سے متعلق مذکورہ شخص کا بیان بھی ریکارڈ کا حصہ بنا لیا گیا ہے۔
پولیس ذرائع کا کہنا ہے کہ بیان میں شخص نے مبینہ طور پر پولیس اہلکار کو ٹریپ کرنے کے لیے رقم دینے کا اعتراف کیا۔ پولیس کے مطابق متعلقہ شخص منشیات کے استعمال کا عادی ہے اور اس کے خلاف منشیات سے متعلق مقدمات کا سابقہ ریکارڈ بھی موجود ہے۔
دوسری جانب ڈی آئی جی آپریشنز نے پولیس کانسٹیبل شعیب کے خلاف بھی مکمل انکوائری کا حکم دے دیا ہے۔ ذرائع کے مطابق ایس ڈی پی او شاہدرہ کو انکوائری کی ذمہ داری سونپی گئی ہے۔
انکوائری کے دوران واقعے کے تمام پہلوؤں، فریقین کے بیانات اور پولیس اہلکار کے طرزِ عمل کا جائزہ لیا جائے گا، جس کے بعد حقائق کی روشنی میں مزید کارروائی کا فیصلہ کیا جائے گا۔
