گوجرانوالہ (پنجاب پوسٹ) محمد رضوان کی پولیس تحویل میں ہلاکت سے متعلق کیس میں پانچ ملزمان کو عدالت میں پیش کردیا گیا۔ ایف آئی اے نے ملزمان سے مزید شواہد کے حصول کے لیے جسمانی ریمانڈ کی استدعا کی۔
عدالت نے پانچوں ملزمان کا پانچ روزہ جسمانی ریمانڈ منظور کرتے ہوئے انہیں 8 اکتوبر تک ایف آئی اے کی تحویل میں دے دیا۔ عدالت نے ملزمان سے مزید شہادت، طبی اور دیگر ریکارڈ حاصل کرنے کے لیے تفتیش جاری رکھنے کا حکم دیا۔
یہ بھی پڑھیں: گرین ٹاؤن میں پولیس کانسٹیبل پر بیوی کو مبینہ طور پر قتل کرنے کا مقدمہ، تحقیقات جاری
عدالت نے پانچوں ملزمان کا متعلقہ طبی افسر سے طبی معائنہ کرانے کا بھی حکم دیا۔ محمد رضوان کی پولیس تحویل میں ہلاکت کیس میں مزید تفتیش کرتے ہوئے ملزمان کے کردار سے متعلق شہادتیں، پولیس ریکارڈ اور دیگر شواہد جمع کرنے کی ہدایت کی گئی۔
محمد رضوان کی پولیس تحویل میں ہلاکت کے معاملے پر ملزمان کے خلاف دفعہ 302، اسلحہ اور زیرحراست تشدد و ہلاکت ایکٹ کے تحت مقدمہ درج ہے۔ دورانِ سماعت ملزمان کی ضمانت کی درخواستیں لاہور ہائیکورٹ سے خارج ہونے کا حوالہ بھی دیا گیا۔
