لاہور (پنجاب پوسٹ) شہر میں منشیات فروشی کے خلاف کارروائی کے دوران پولیس اہلکار کے مبینہ طور پر منشیات فروخت کرنے کا انکشاف ہوا ہے۔ تھانہ داتا دربار کی حدود میں پولیس نے منشیات فروشی کے الزام میں حاضر سروس پولیس اہلکار کو گرفتار کرلیا۔
ایف آئی آر کے مطابق تھانہ داتا دربار پولیس کو اطلاع ملی کہ عمر پارک بلال گنج میں ایک شخص پیدل منشیات فروشی کر رہا ہے۔ اطلاع پر پولیس موقع پر پہنچی اور مذکورہ شخص کو گرفتار کرلیا۔
یہ بھی پڑھیں: چوہنگ پولیس نے 2 رکنی رکشہ چور گینگ پکڑ لیا ،کتنے رکشے برآمد ہوئے ؟
ایف آئی آر کے مطابق گرفتار شخص کی شناخت شاہد علی، سکنہ ریلوے کالونی مغلپورہ، کے نام سے ہوئی۔ شاہد علی کے قبضے سے اڑھائی کلو منشیات برآمد ہوئی۔
ایف آئی آر کے مطابق گرفتار شخص نے بتایا کہ وہ حاضر سروس پولیس ملازم ہے۔ تھانہ داتا دربار پولیس نے پولیس اہلکار شاہد علی کے خلاف اختیارات سے تجاوز اور 9-C کی دفعات کے تحت مقدمہ درج کرکے اسے گرفتار کرلیا۔
