پنجاب میں بلدیاتی انتخابات کب کروائے جارہے ہیں ؟ مجوزہ تاریخ سامنے آگئی

لاہور(پنجاب پوسٹ)الیکشن کمیشن آف پاکستان نے پنجاب حکومت کو صوبے میں بلدیاتی انتخابات 14 دسمبر کو کروانے کی تجویز دے دی ہے۔ اس سلسلے میں الیکشن کمیشن نے انتخابات کا ڈرافٹ شیڈول چیف سیکریٹری پنجاب کو ارسال کر دیا ہے، جس کے مطابق پولنگ 14 دسمبر کو ہوگی۔

کاغذات نامزدگی اور جانچ پڑتال

مجوزہ شیڈول کے تحت امیدوار 27 اکتوبر سے 30 اکتوبر کے درمیان کاغذات نامزدگی جمع کروا سکیں گے، جبکہ ان کی جانچ پڑتال 2 سے 5 نومبر تک کی جائے گی۔

اپیلیں اور ٹربیونلز

کاغذات نامزدگی کے خلاف اپیلیں 7 سے 11 نومبر کے دوران دائر کی جا سکیں گی، جنہیں ٹربیونلز 12 سے 16 نومبر کے درمیان نمٹائیں گے۔ امیدوار 18 نومبر تک اپنے کاغذات نامزدگی واپس لے سکیں گے۔

یہ بھی پڑھیں:اینٹی ہراسمنٹ ایکٹ ، خواتین سادہ کاغذ پر بھی اپنی شکایت درج کرا سکتی ہیں،محتسب پنجاب ڈاکٹر نجمہ افضل

حتمی فہرست، انتخابی نشانات اور پولنگ

شیڈول کے مطابق امیدواروں کی حتمی فہرست 19 نومبر کو آویزاں کی جائے گی، جبکہ 20 نومبر کو انتخابی نشانات الاٹ کیے جائیں گے۔ پولنگ 14 دسمبر کو ہوگی اور ریٹرننگ افسران 17 دسمبر تک انتخابی نتائج کا اعلان کریں گے۔

الیکشن کمیشن کا مراسلہ

ایڈیشنل ڈی جی الیکشن کمیشن ندیم قاسم نے اس حوالے سے چیف سیکریٹری پنجاب کو مراسلہ بھی تحریر کیا ہے، جس میں کہا گیا ہے کہ مجوزہ شیڈول پر اپنا فیڈ بیک جلد از جلد ارسال کیا جائے۔

پس منظر

واضح رہے کہ الیکشن کمیشن کے ساتھ ہونے والے مشاورتی اجلاس میں پنجاب حکومت نے 15 دسمبر سے 15 جنوری کے درمیان بلدیاتی انتخابات کروانے کی تجویز دی تھی۔ الیکشن کمیشن نے پنجاب حکومت کی اس تجویز کو تسلیم کیا تھا، اور اسی کی روشنی میں صوبے میں بلدیاتی انتخابات کا ڈرافٹ پروگرام تیار کیا گیا ہے۔

یہ بھی پڑھیں:سپیشل ایجوکیشن کے طلبہ کیلئے ہمت کارڈز کا اجرا، شناختی کارڈ کے مسائل دور کرنے کیلئے حکومت کیا کر رہی ہے؟