لاہور (پنجاب پوسٹ) موٹروے پولیس ایم سی ون زون کی ٹریفک قوانین کی خلاف ورزیوں اور جرائم کے خلاف کارروائیاں جاری ہیں۔ موٹروے پولیس نے مختلف واقعات میں تین مقدمات درج کروا دیے۔ ترجمان موٹروے پولیس سید عمران احمد کے مطابق موٹروے ایم تھری پر پِیر محل کے قریب ایک گاڑی کو 174 کلومیٹر فی گھنٹہ کی خطرناک رفتار سے چلانے پر روک کر ڈرائیور کے خلاف قانونی کارروائی کی گئی، جس کے نتیجے میں تھانہ رجانہ، ٹوبہ ٹیک سنگھ میں مقدمہ درج کرلیا گیا۔
یہ بھی پڑھیں:پولیس کی موبائل ایپ نے تین سال سے لاہور میں چھپے انسانی اسمگلرز کیسے گرفتار کروائے؟
دوسری کارروائی میں موٹروے ایم تھری ننکانہ صاحب کے قریب ایک اوورلوڈ ٹریلر کو روکا گیا۔ جانچ پڑتال کے دوران گاڑی مقررہ وزن سے زائد لدی ہوئی پائی گئی، جس پر ڈرائیور کے خلاف قانونی کارروائی کرتے ہوئے تھانہ شرقپور شریف، ضلع شیخوپورہ میں مقدمہ درج کرلیا گیا۔
یہ بھی پڑھیں:کوٹ لکھپت جیل کے کچن میں دو گروپوں کے جھگڑے میں قتل اور زخمی ہونے کا معاملہ
اسی طرح سیال موڑ سروس ایریا میں رقم چوری کے اسکینڈل پر بھی فوری قانونی کارروائی عمل میں لائی گئی اور تھانہ لکسیاں، ضلع سرگودھا میں مقدمہ درج کرلیا گیا۔ ترجمان کے مطابق موٹروے پولیس سڑکوں پر ٹریفک قوانین کی خلاف ورزیوں کے ساتھ ساتھ شہریوں کے تحفظ اور جرائم کی روک تھام کے لیے بھی مؤثر اقدامات جاری رکھے ہوئے ہے۔
