پولیس والوں کے ٹھنڈے کمروں میں بیٹھ کر دماغ کام نہیں کررہے، چیف جسٹس عالیہ نیلم

لاہور(پنجاب پوسٹ)لاہور ہائیکورٹ کی چیف جسٹس عالیہ نیلم نے لاہور پولیس کی کارکردگی اور عدالت میں پیش کی جانے والی رپورٹس پر شدید ناراضگی کا اظہار کیا ہے۔ یہ معاملہ شہری مومن خان کی 2021 میں دائر کردہ اس درخواست کی سماعت کے دوران سامنے آیا جو سابق سی سی پی او فیاض احمد کے خلاف توہینِ عدالت سے متعلق تھی۔

سماعت میں موجودہ سی سی پی او بلال صدیق کمیانہ، ڈی آئی جی ایڈمن عمران کشور کے ہمراہ پیش ہوئے، جبکہ ایڈیشنل ایڈووکیٹ جنرل محمد نوید شیخ اور اسسٹنٹ ایڈووکیٹ جنرل وقاص عمر بھی عدالت میں موجود تھے۔

یہ بھی پڑھیں:کب تشریف لا رہے ہیں بادشاہ سلامت ؟کیس کیوں انتظار کروایا جارہا ہے ؟چیف جسٹس لاہور ہائیکورٹ وفاقی سیکرٹری اسٹیبلشمنٹ پر برہم کیوں ہوئیں؟

چیف جسٹس نے سی سی پی او سے استفسار کیا کہ عدالت کی طلبی میں کمی سے پولیس کا رویہ اس حد تک متاثر ہوا کہ اگر اس عدالت کے ساتھ یہ سلوک ہے تو باقی عدالتوں میں صورتحال کیا ہوگی۔ انہوں نے پولیس افسران کی جمع کردہ رپورٹس کی خامیوں پر بھی سخت تنقید کی اور ریمارکس دیے کہ ٹھنڈے کمروں میں بیٹھ کر افسران کا دماغ کام نہیں کر رہا۔

سی سی پی او نے عدالت کو آگاہ کیا کہ غفلت برتنے والے افسران کے خلاف محکمانہ کارروائی جاری ہے، ایس پی آپریشن کو ناپسندیدگی کا نوٹس، اے ایس پی سے وضاحت طلبی اور ایس ایچ او کو شوکاز نوٹس جاری کیا جا چکا ہے۔ چیف جسٹس نے اس پر بھی عدم اطمینان ظاہر کیا اور کہا کہ محض کارروائی کا دکھاوا نتیجہ خیز نہیں۔

یہ بھی پڑھیں:اب سیشن جج گریڈ ون سے گریڈ 16 تک بھرتیاں خود نہیں کرسکیں گے ،پنجاب کی ماتحت عدالتوں کا 150 سالہ نظام ختم کردیا گیا

عدالت نے گزشتہ پانچ برس کے دوران عدالتی احکامات پر پولیس افسران کے خلاف کارروائیوں کا ریکارڈ طلب کرنے کا عندیہ بھی دیا۔ سی سی پی او نے مستقبل میں ایسی صورتحال نہ دہرانے کی یقین دہانی کروائی، جس پر چیف جسٹس نے خبردار کیا کہ دوبارہ ایسا ہوا تو ان کی رپورٹ پر اعتماد نہیں کیا جائے گا۔ عدالت نے درخواست گزار کو طلب کرتے ہوئے سماعت کل تک ملتوی کر دی۔