لاہور(پنجاب پوسٹ) وزیراعلیٰ پنجاب مریم نواز شریف نے سعودی عرب کے قومی دن کے موقع پر خصوصی پیغام جاری کرتے ہوئے سعودی قیادت اور عوام کو دلی مبارکباد پیش کی ہے اور دونوں برادر اسلامی ممالک کے درمیان دیرینہ تعلقات کو سراہا ہے۔
اپنے پیغام میں وزیراعلیٰ مریم نواز شریف نے کہا کہ پاکستان اور سعودی عرب کے عوام مکہ معاہدے پر بے حد مسرت کا اظہار کر رہے ہیں، جسے انہوں نے خطے میں امن اور استحکام کی جانب ایک اہم اور تاریخی قدم قرار دیا۔ انہوں نے کہا کہ پاکستانی عوام حرمین شریفین کی حفاظت کو اپنے لیے سعادت اور اعزاز سمجھتے ہیں، اور پاکستانی قیادت و عوام سعودی عرب کو ہمیشہ محبت، عقیدت اور قدر کی نگاہ سے دیکھتے ہیں۔
وزیراعلیٰ پنجاب نے مزید کہا کہ پاکستان اور سعودی عرب کے درمیان تعلقات محض سفارتی نہیں بلکہ اعتماد، خلوص اور اخوت کی مضبوط بنیادوں پر قائم ہیں۔ ان کا کہنا تھا کہ دونوں ممالک کے تعلقات دینِ اسلام، بھائی چارے اور باہمی اعتماد کی روشن مثال ہیں، جو نسل در نسل مزید مستحکم ہوتے جا رہے ہیں۔
مریم نواز شریف نے ولی عہد شہزادہ محمد بن سلمان کی قائدانہ صلاحیتوں کو بھی خراجِ تحسین پیش کیا اور کہا کہ ان کی بصیرت اور دانشمندی کی بدولت آج سعودی عرب دنیا بھر میں ایک بلند اور قابلِ فخر مقام رکھتا ہے۔ انہوں نے سعودی عرب میں امن، ترقی اور خوشحالی کے تسلسل کے لیے نیک تمناؤں اور دعاؤں کا اظہار کیا۔
اپنے پیغام کے اختتام پر وزیراعلیٰ پنجاب نے دعا کی کہ اللہ تعالیٰ پاکستان اور سعودی عرب کے مابین قائم بھائی چارے اور دوستی کو ہمیشہ سلامت رکھے اور دونوں ممالک کے عوام کو مزید خوشحالی سے نوازے۔
