اب سیشن جج گریڈ ون سے گریڈ 16 تک بھرتیاں خود نہیں کرسکیں گے ،پنجاب کی ماتحت عدالتوں کا 150 سالہ نظام ختم کردیا گیا

لاہور(پنجاب پوسٹ)لاہور ہائیکورٹ نے ماتحت عدالتوں میں عملے کی بھرتی کے حوالے سے ایک تاریخی اور اہم فیصلہ کرتے ہوئے 150 سال سے رائج پرانے نظام کو ختم کر دیا ہے، جس کے تحت سیشن ججز کو حاصل براہ راست بھرتی کے اختیارات واپس لے لیے گئے ہیں۔

ذرائع کے مطابق چیف جسٹس عالیہ نیلم کی سربراہی میں لاہور ہائیکورٹ کے فل کورٹ اجلاس میں نئے رولز کی متفقہ طور پر منظوری دی گئی۔ اس فیصلے کے نتیجے میں اب سیشن ججز اپنے اپنے اضلاع میں ماتحت عدالتوں کا عملہ براہ راست بھرتی نہیں کر سکیں گے۔ نائب قاصد سے لے کر گریڈ 16 تک کی تمام آسامیوں پر سیشن ججز کے براہ راست بھرتی کرنے کے اختیارات مکمل طور پر ختم کر دیے گئے ہیں۔

یہ بھی پڑھیں:کیا آپ جانتے ہیں پنجاب حکومت کے ریکارڈ میں صوبہ بھر میں 1 ہزار 420 پبلک ٹوائلٹس موجود ہیں، لیکن کتنے درست حالت میں ہیں؟ عدالت میں کیا دعویٰ کیا گیا؟

نئے نظام کے تحت ماتحت عدالتوں میں بھرتیوں کے لیے لاہور ہائیکورٹ کے سیکریٹریٹ میں ایک نیا مرکزی نظام قائم کیا جائے گا۔ طریقہ کار کے مطابق جس ضلع میں عملے کی کمی ہوگی، متعلقہ سیشن جج ڈی جی اسٹیبلشمنٹ کو خالی آسامیوں سے آگاہ کرے گا۔ اس کے بعد ڈی جی اسٹیبلشمنٹ چھان بین مکمل کرکے بھرتی کا کیس لاہور ہائیکورٹ سیکریٹریٹ کو بھجوائے گا۔

امیدواروں کی بھرتی میرٹ کی بنیاد پر ہوگی، جس کے لیے تحریری امتحان اور انٹرویو کا مرحلہ لازمی قرار دیا گیا ہے۔ ذرائع کا کہنا ہے کہ لاہور ہائیکورٹ نے ماتحت عدالتوں میں بھرتیوں کے لیے شفاف اور واضح طریقہ کار وضع کر دیا ہے تاکہ میرٹ اور شفافیت کو یقینی بنایا جا سکے۔

یہ بھی پڑھیں:سرکاری ملازمین، پبلک آفس ہولڈر سمیت دیگر افراد کو پبلک سروس کے نام پر سول ایوارڈ دینے کے خلاف درخواست خارج

اس ضمن میں پنجاب حکومت جلد نئے عدالتی عملے کی بھرتی سے متعلق نئے رولز کا باضابطہ نوٹیفکیشن جاری کرے گی۔