راولپنڈی (پنجاب پوسٹ) پی کے ایل آئی راولپنڈی میں پہلی مرتبہ گردے اور جگر کی پیوند کاری کامیابی سے مکمل کرلی گئی، ٹرانسپلانٹ سروسز کا باقاعدہ آغاز بھی کردیا گیا۔
پی کے ایل آئی راولپنڈی میں پہلا گردہ اور دو جگر کے ٹرانسپلانٹس کامیابی سے مکمل کیے گئے، جس کے بعد راولپنڈی میں ٹرانسپلانٹ سروسز کا باقاعدہ آغاز ہوگیا ہے۔
یہ سہولت گلگت بلتستان، خیبر پختونخوا اور شمالی علاقوں کے مریضوں کے لیے اہم پیش رفت قرار دی جارہی ہے۔ اب ان علاقوں کے مریضوں کو جدید ٹرانسپلانٹ سہولیات اپنے علاقوں کے قریب میسر ہوں گی۔
یہ بھی پڑھیں: بھکاری نہیں کاروباری، لاہور شہر سے 8 ماہ میں 5 ہزار 327 بھکاری گرفتار، 947 مقدمات درج
پی کے ایل آئی میں تقریباً 50 فیصد مریضوں کا علاج مکمل طور پر مفت کیا جاتا ہے۔ پی کے ایل آئی راولپنڈی میں مستقبل میں وفات پانے والے عطیہ دہندگان سے گردے کی پیوند کاری کی سہولت بھی متوقع ہے۔
پی کے ایل آئی منصوبے کی بنیاد 2016 میں وزیراعظم شہباز شریف نے رکھی تھی، جبکہ منصوبے کو وزیراعلیٰ پنجاب کے تعاون سے آگے بڑھایا گیا۔
پی کے ایل آئی لاہور میں اب تک 1,350 جگر، 1,250 گردے اور 22 بون میرو ٹرانسپلانٹس مکمل کیے جا چکے ہیں۔
