وہاڑی(پنجاب پوسٹ)وزیراعظم کی خصوصی پٹرول ریلیف سکیم کے تحت شہریوں کو 100 روپے فی لیٹر سستا پٹرول فراہم کرنے کے عمل کا جائزہ لینے کے لیے ڈپٹی کمشنر خالد جاوید گورائیہ نے رات گئے مختلف پٹرول پمپس کا دورہ کیا۔ انہوں نے پٹرول پمپس پر قائم سہولت کاؤنٹرز کا معائنہ کیا اور شہریوں کو فراہم کی جانے والی سہولیات کا جائزہ لیا۔
ڈپٹی کمشنر خالد جاوید گورائیہ نے سستا پٹرول حاصل کرنے کے لیے آنے والے شہریوں سے سبسڈی کے حصول اور سروس کے بارے میں معلومات لیں۔ شہریوں نے سبسڈی پر پٹرول کی فراہمی پر اطمینان کا اظہار کرتے ہوئے وزیراعظم پاکستان کا شکریہ ادا کیا۔
یہ بھی پڑھیں:وفاقی حکومت کا پیٹرولیم مصنوعات کی بڑھتی قیمتوں کے باعث اسمارٹ لاک ڈاؤن لگانے کا فیصلہ
ڈپٹی کمشنر نے پٹرول پمپس کی انتظامیہ کو ہدایت کی کہ وزیراعظم کی خصوصی پٹرول ریلیف سکیم پر مؤثر اور شفاف عملدرآمد یقینی بنایا جائے تاکہ زیادہ سے زیادہ مستحق شہری اس سہولت سے فائدہ اٹھا سکیں۔
اس موقع پر ڈپٹی کمشنر خالد جاوید گورائیہ نے کہا کہ شہریوں کو وزیراعظم کی خصوصی پٹرول ریلیف سکیم کے ثمرات پہنچانے کے لیے ضلعی انتظامیہ متحرک ہے اور پٹرول پمپس پر فراہم کی جانے والی سہولیات کی مسلسل نگرانی کی جا رہی ہے۔ دورے کے موقع پر اے ڈی سی انفورسمنٹ عثمان جلیس اور دیگر افسران بھی موجود تھے۔
یہ بھی پڑھیں:ڈیزل کی بڑھتی قیمتیں ،پبلک ٹرانسپورٹرز کا بڑا قدم ، کیا کاروبار بند کئے جارہے ہیں ؟
