پنجاب کی پانچ میڈیکل یونیورسٹیوں کے وائس چانسلرز کی تعیناتی کا معاملہ اہم مرحلے میں داخل ہوگیا

لاہور(پنجاب پوسٹ)پنجاب کی پانچ بڑی میڈیکل یونیورسٹیوں کے وائس چانسلرز کی تعیناتی کا معاملہ اہم مرحلے میں داخل ہوگیا ہے، جبکہ نئی تعیناتیوں کے لیے امیدواروں کے نام فائنل کرلیے گئے ہیں۔ سمری کے مطابق پانچوں میڈیکل یونیورسٹیوں کے وائس چانسلرز کی نامزدگیوں کی منظوری پنجاب کابینہ سے بھی حاصل کرلی گئی ہے۔

سمری کے مطابق کنگ ایڈورڈ میڈیکل یونیورسٹی کے وائس چانسلر کے لیے پروفیسر ڈاکٹر محمود ایاز کا نام فائنل کیا گیا ہے، جبکہ یونیورسٹی آف ہیلتھ سائنسز کے لیے میجر جنرل ریٹائرڈ سہیل صابر کو نامزد کیا گیا ہے۔

یہ بھی پڑھیں:طالبات کو محفوظ ،باوقار اور احترام پر مبنی تعلیمی ماحول اولین ترجیح ،ہراسانی پر زیرو ٹالرنس ہے،ڈاکٹر عظمیٰ ،وی سی لاہور کالج

اسی طرح راولپنڈی میڈیکل یونیورسٹی کے وائس چانسلر کے لیے میجر جنرل ریٹائرڈ سہیل امین اور فیصل آباد میڈیکل یونیورسٹی کے لیے پروفیسر سید اصغر نقوی کا نام شامل ہے۔فاطمہ جناح میڈیکل یونیورسٹی کے وائس چانسلر کے لیے پروفیسر ڈاکٹر زہرہ خانم کو نامزد کیا گیا ہے۔

سمری میں شامل تمام ناموں کی منظوری پنجاب کابینہ سے لیے جانے کے بعد اب سمری گورنر پنجاب کو ارسال کردی گئی ہے۔ گورنر پنجاب کی بطور چانسلر منظوری کے بعد پانچوں میڈیکل یونیورسٹیوں کے وائس چانسلرز کی تعیناتی کے باقاعدہ احکامات جاری کیے جائیں گے۔

یہ بھی پڑھیں:گورنمنٹ سکولوں کے نتائج پر سوالات، محکمہ تعلیم نے ننکانہ صاحب میں اچھے نمبر لینے والی لڑکی کو ایک دن کیلئے سی ای او ایجوکیشن بنا دیا گیا